रेशनिंगचा २४ टन तांदूळ साठा जप्त

लोकमत न्यूज नेटवर्क

सांगली : जिल्ह्यात रेशनिंग तांदळाचा मोठा घोटाळा उघडकीस आणण्यात सांगली ग्रामीण पोलिसांना यश आले आहे. सोमवारी चाबुकस्वारवाडी येथे पोलिसांनी छापा टाकून आणखी २४ टन तांदळाचा साठा जप्त केला. याप्रकरणी रमेश बाबू गुंडेवाडी (वय ४७, रा. सलगरे) याला अटक करण्यात आली आहे. आतापर्यंत ८४ टन बेकायदा तांदळाचा साठा जप्त केला आहे.

सांगली ग्रामीण पोलिसांनी २ डिसेंबर रोजी लक्ष्मीफाटा येथे तांदळाची वाहतूक करणारा ट्रक पकडला होता. या ट्रकमधून २० टन रेशनिंगचा तांदूळ जप्त करण्यात आला होता. याप्रकरणी बिऊर (ता. शिराळा) येथील संदीप वीरभद्र कानकत्रे व प्रवीण वीरभद्र कानकत्रे या दोघांना अटक करण्यात आली. या प्रकरणाचा तपास सुरू असतानाच बिऊर येथील सिद्धनाथ राईस मिलच्या गोदामातून आणखी ४० टन तांदूळ साठा ताब्यात घेण्यात आला.

पोलिसांनी तांदूळ घोटाळ्याचा सखोल तपास हाती घेतला असता, सलगरे येथील रमेश गुंडेवाडी हा मोठ्या प्रमाणात तांदूळ विक्री करीत असल्याची माहिती मिळाली. त्यानुसार एलसीबीच्या पथकाने त्याच्या मूळ गावी चाबुकस्वारवाडी येथे तपास केला असता, २४ टन तांदूळ सापडला. त्याची किंमत ७ लाख २० हजार इतकी आहे.

याप्रकरणी गुंडेवाडी याला अटक करण्यात आली आहे. त्याला १० डिसेंबरपर्यंत पोलीस कोठडी सुनावण्यात आली आहे. या प्रकरणाचा तपास उपनिरीक्षक सागर पाटील, हवालदार संदीप मोरे, सचिन मोरे, शंतनू ढवळीकर करीत आहेत.

चौकट

आतापर्यंत ८४ टन तांदूळ जप्त

पोलिसांनी आतापर्यंत रेशनिंगचा ८४ टन तांदूळ साठा जप्त केला आहे. त्याची किंमत ३१ लाख २० हजार इतकी आहे. आणखी कोठून तांदूळ आला, किती जणांचा यात सहभाग आहे, आणखी कोठे बेकायदा साठा आहे का, याचा तपास संशयितांकडे सुरू असल्याचे सहायक पोलीस अधीक्षक नित्यानंद झा यांनी सांगितले.