दापोलीत कोरोना लसींचा तुटवडा

जिल्हा युवा सेनेची ऑनलाइन बैठक

खेड : कोरोनाच्या पार्श्वभूमीवर जिल्हा युवा सेनेची ऑनलाइन बैठक युवा सेना सचिव सूरज चव्हाण, आमदार योगेश कदम, जिल्हा परिषद अध्यक्ष विक्रांत जाधव यांच्या उपस्थितीत पार पडली. बैठकीत युवा सेना जिल्हाधिकारी अजिंक्य मोरे यांनी लसीकरण केंद्र वाढवण्याची मागणी केली. तसेच कळंबणी उपजिल्हा रुग्णालयात हवेतून ऑक्सिजन निर्मिती करणारे प्लांट देण्याची मागणी केली.

कोरोनाविषयी जनजागृती

खेड : महाराष्ट्र दिनाचे औचित्य साधून येथील पोलीसस्थानक अंतर्गत लोटे पोलीस दूरक्षेत्र येथील पोलिसांनी लोटेतील झोपडपट्टीवासीयांना कोरोनाविषयी मार्गदर्शन केले. याचवेळी हँडवॉश, सॅनिटायझर, मास्कचे वाटप करण्यात आले. काेराेनाचा संसर्ग न हाेण्यासाठी काेणती काळजी घेतली पाहिजे याचीही माहिती यावेळी देण्यात आली.

शिव प्राथमिक केंद्रात मास्कचे वाटप

खेड : तालुक्यातील शिव प्राथमिक आरोग्य केंद्रात महाराष्ट्र नवनिर्माण कामगार सेनेचे जिल्हा सरचिटणीस संदीप फडकले यांच्या माध्यमातून सॅनिटायझर, मास्क व हॅन्डग्लोव्ह्जचे वाटप करण्यात आले. तालुक्यातील शेल्डी, मेटे, असगणी, शिव, कोतवली, आयनी, सात्विनगाव, सोनगाव, कुंभाड या ठिकाणीही वाटप करण्यात आले.

खेडमध्ये २,२८० रुग्णांची कोरोनावर मात

खेड : एकीकडे तालुक्यात कोरोनाचा कहर सुरू असताना दुसरीकडे कोरोनाची साखळी तोडण्यासाठी आरोग्य यंत्रणेसह अन्य प्रशासकीय यंत्रणा सर्व पातळ्यांवर प्रयत्नशील आहे. आतापर्यंत २,२८० रुग्णांनी कोरोनावर मात केली आहे. दरम्यान, कळंबणी उपजिल्हा रूग्णालयातील कोविड सेंटरमध्ये ५०, घरडा कोविड सेंटरमध्ये ४८, नगर परिषदेच्या कोविड सेंटरमध्ये २१, तर शिवतेज आरोग्य सेवा संस्थेच्या कोविड सेंटरमध्ये ४७ रुग्ण उपचार घेत आहेत.