पावणेतीन लाखांचा दरोडा; चिपळूण तालुक्यातील घटना

इतर तिघांनी घरात शिरून दोन सोन्याची मंगळसूत्र, ब्रेसलेट, चेन, दोन बांगड्या, अंगठी, हार असे दागिने व दहा हजार रुपयांची रोख मिळून दोन लाख ८८ हजारांचा ऐवज चोरून नेला

चिपळूण : तालुक्यातील कुशिवडे-खोडदेवाडी येथे २४ खोल्यांच्या घरात पाच चोरट्यांनी गुरुवारी रात्री दामू गावकर यांच्या घरात शिरून सोन्याचे दागिने व दहा हजारांची रोकड मिळून दोन लाख ८८ हजारांचा ऐवज लुटला. कुशिवडे-खोडदेवाडी येथे दामू गावकर यांचे लांबसडक चाळीसारखे २४ खोल्यांचे घर आहे. या घरातील वैशाली डिके यांच्या खोलीत हा दरोडा पडला. वैशाली व त्यांचे पती टीव्ही पाहत होते. कार्यक्रम चालू असताना रात्री १०.३० च्या दरम्यान वैशाली खोलीत आल्या. झोपण्यापूर्वी घराच्या मागच्या बाजूला जाण्यासाठी त्यांनी दरवाजा उघडला. त्याचवेळी दरवाजातून दोन पुरुष घुसले व त्यांनी वैशाली यांचे हात व तोंड दाबून त्यांना धरून ठेवले. इतर तिघांनी घरात शिरून दोन सोन्याची मंगळसूत्र, ब्रेसलेट, चेन, दोन बांगड्या, अंगठी, हार असे दागिने व दहा हजार रुपयांची रोख मिळून दोन लाख ८८ हजारांचा ऐवज चोरून नेला. (प्रतिनिधी)