देवरुख (रत्नागिरी ) - देवरुख-संगमेश्वर राज्य मार्गावर एसटी बस व झायलो कारमध्ये झालेल्या भीषण अपघातात एका महिलेचा मृत झाला आहे. मृत महिलेचे नाव रजनी रमेश करोगल (63) असे आहे. रजनी करोगल या डोंबिवली येथील रहिवासी होत्या. सोमवारी (1 जानेवारी )सकाळी 9 वाजण्याच्या सुमारास कोसुंब येथील ही दुर्घटना झाली आहे. हा अपघात एवढा भीषण होता की, यामध्ये झायलो गाडीचा अक्षरशः चुराडा झाला आहे.
एसटी आणि मुंबई-डोंबिवली येथून आलेल्या प्रवाशांची झायलो कारची समोरासमोर धडक झाली. या अपघातात झायलो कारमधून प्रवास करणा-या रजनी यांचा मृत्यू झाला तर 10 प्रवासी जखमी झाले आहेत. झायलो गाडीतील अन्य प्रवासी मुंबई, डोंबिवली येथील रहिवासी आहेत.
हे सर्व जण राजापूरचे आमदार राजन साळवी यांच्या मित्रपरिवारातील असल्याची माहिती मिळत आहे. जखमींना देवरुखच्या ग्रामीण रुग्णालयात दाखल करण्यात आले आहे.