गायकवाड यांचा सत्कार

भाडे माफ करण्याची मागणी

राजापूर : कोरोनामुळे लॉकडाऊन झाल्याने एस. टी. वाहतुकीवर परिणाम झाला. त्यामुळे भाडेतत्वावर असलेल्या व्यावसायिकांना याचा आर्थिक भुर्दंड बसला आहे. त्यामुळे एस. टी. महामंडळाने दुकानांचे भाडे माफ करावे, अशी मागणी या व्यावसायिकांतून होत आहे.

धामणवणेत वृक्षारोपण

चिपळूण : तालुक्यातील धामणवणे ग्रामपंचायतीतर्फे वृक्षारोपण करण्यात आले. जिल्हा परिषद सदस्य दिशा दाभोळकर यांच्या हस्ते रोपांची लागवड करण्यात आली. यावेळी नीलेश शेंबेकर, उद्योजक शिरीष चौधरी, विश्व हिंदू परिषदेचे कार्यकर्ते शिवाजी शिंदे, सुभाष जाधव, ग्रामपंचायत सदस्य रियाज सावंत उपस्थित होते.

बिले भरण्याची मागणी

दापोली : खासगी रुग्णालयात कोरोनाचे उपचार घेणाऱ्या गरीब शेतकऱ्यांची वैद्यकीय बिले शासनाने भरावीत, अशी मागणी माजी आमदार संजय कदम यांनी केली आहे. तहसीलदार वैशाली पाटील यांना त्यांनी याबाबतचे पत्र दिले आहे. उपजिल्हा रुग्णालयात बेड कमी असल्याने रुग्णांना खासगी रुग्णालयांचा आधार घ्यावा लागत आहे.

वाहतूक कोंडी

चिपळूण : बहादूरशेख नाक्यावरील चौकात चिपळूण - कऱ्हाड मार्गावर पाईपलाईनसाठी खोदलेला खड्डा गेले दोन महिने जैसे थे परिस्थितीत आहे. त्यामुळे या परिसरात वाहतूक कोंडी होत असून, अपघाताचा धोका निर्माण झाला आहे. शहरातील पाण्याच्या पाईपलाईनसाठी हे खोदकाम करण्यात आले आहे.

सोलर यंत्रणेचे नुकसान

रत्नागिरी : जिल्हा परिषदेच्या इमारतीवर बसविण्यात आलेल्या सोलर विद्युत संचाच्या चौदा पॅनलसह अन्य साहित्याचे तौक्ते चक्रीवादळामुळे नुकसान झाले आहे. अपारंपरिक ऊर्जा विकास कार्यक्रमांतर्गत हा प्रकल्प सुरु करण्यात येणार असून, दरवर्षी काही लाख वीजबिलांच्या रकमेची बचत होणार आहे.

रस्त्याची दुरवस्था

दापोली : तालुक्यातील आंजर्ले येथील पाणी पुरवठा योजनेचे काम सुरु आहे. यासाठी उभानगर येथील रस्त्यावर काढलेले खड्डे योग्य पद्धतीने न बुजविल्यामुळे वाहनचालकांना संकटाचा सामना करावा लागत आहे. पावसामुळे रस्ते निकृष्ट झाले असून, वाहनांची चाके खड्ड्यात फसत आहेत. त्यामुळे वाहनचालकांमधून नाराजी व्यक्त होत आहे.

वर्धापन दिन साजरा

दापोली : न. का. वराडकर कला, रा. वि. बेलोसे वाणिज्य, कै. शांतीलाल जैन विज्ञान कनिष्ठ व वरिष्ठ महाविद्यालयाचा वर्धापन दिन सोहळा साजरा करण्यात आला. यानिमित्ताने वृक्षारोपण करण्यात आले. प्राचार्य डॉ. सुरेश निंबाळकर यांनी प्रास्ताविक केले. संस्थेच्या अध्यक्ष जानकी बेलोसे, सुनीता बेलोसे यावेळी उपस्थित होत्या.

महासंघाचे निवेदन

दापोली : कास्ट्राईब कर्मचारी महासंघाच्या दापोली शाखेतर्फे पदोन्नती आरक्षणाच्या संविधानिक न्याय मागणीसाठी तहसीलदारांना निवेदन देण्यात आले. शासनाची पदोन्नतीच्या कोट्यातील ३३ टक्के पदे रिक्त आहेत. खुल्या वर्गातील पदे सेवाज्येष्ठतेच्या नियमानुसार भरण्याच्या सूचना देण्यात आल्या आहेत.

सेंद्रिय भात लागवड

दापोली : डॉ. बाळासाहेब सावंत कोकण कृषी विद्यापीठ, दापोली अंतर्गत कृषी विद्या विभागांतर्गत सेंद्रिय शेती संशोधन व प्रशिक्षण प्रकल्पांतर्गत शेतकऱ्यांसाठी ‘सेंद्रिय भात लागवड व उत्पादन तंत्रज्ञान’ या विषयावर एकदिवसीय प्रात्यक्षिक प्रशिक्षण कार्यक्रम आयोजित करण्यात आला होता. यावेळी विभागप्रमुख डॉ. प्रशांत बोडके यांनी मार्गदर्शन केले.