दोणवली आरोग्य उपकेंद्राचे भूमिपूजन

चिपळूण : तालुक्यातील कापरे प्राथमिक प्राथमिक आरोग्य केंद्रअंतर्गत दोणवली येथे उपकेंद्र व्हावे, अशी मागणी सातत्याने ग्रामस्थांमधून केली जात होती. अखेर त्याला यश आले आहे. उपकेंद्रासाठी आवश्यक जागा उपलब्ध झाल्याने निधी मंजूर झाला आणि या उपकेंद्र इमारतीचे भूमिपूजन जिल्हा सहकार बोर्डाचे माजी अध्यक्ष व दोणवलीचे माजी सरपंच डॉ. मधुकर चांदिवडे यांच्या हस्ते करण्यात आले.

दोणवली येथील ग्रामस्थ व महिलांना आरोग्यविषयक सेवा सुविधांसाठी कापरे प्राथमिक आरोग्य केंद्रात जावे लागत होते. त्यामुळे गावातच उपकेंद्र होण्याची मागणी अनेक वर्षे केली जात होती. मात्र, त्यासाठी आवश्यक जागा उपलब्ध होत नव्हती. सरपंच डॉ. मंदार चांदिवडे यांनी बिनविरोध सरपंच म्हणून सुत्रे स्वीकारल्यानंतर रखडलेली कामे मार्गी लावण्याचा प्रयत्न केले. गावात आवश्यक ठिकाणी सरंक्षक भिंती, वाडीवस्तीवर पाखाड्या, अंतर्गत रस्ते मार्गी लावले. उपकेंद्रासाठी मोफत जागा मिळण्यासाठी त्यांनी ग्रामस्थांशी नियमित संवाद ठेवला. यातून प्रमोदिनी गुरव व प्रेमिला मारूती गुरव या दोन्ही सख्ख्या बहिणींनी रस्त्यालगत असलेली ५ गुंठे जागा उपकेंद्रासाठी विनामूल्य उपलब्ध करून दिली.

भूमिपूजनप्रसंगी या दोन्ही भगिनींचे ग्रामपंचायतीच्यावतीने आभार मानण्यात आले. कार्यक्रमाला माजी सरपंच सुशिला पवार, जाफर कवारे, संताजी कदम, तंटामुक्त समितीचे अध्यक्ष सुभाष कदम, उपसरपंच हेमंत परचुरे, सदस्य गणेश लाड, अश्‍विनी भुवड, जरिना डबीर, मानसी पवार, सोसायटी चेअरमन अशोक चव्हाण, मुंबई मंडळाचे अध्यक्ष अप्पा चव्हाण, प्रकाश चव्हाण आदी उपस्थित होते.