बारामती : बारामती शहरात तरूण पोलिसाने गळफास घेऊन आत्महत्या केल्याची घटना सोमवारी (दि ११)सायंकाळी घडली. तुषार सानप (वय ३०)असे या तरूण पोलिसाचे नाव आहे. तुषार हे शहरातील पोलीस वसाहतीत राहायला होते. येथील राहत्या घरी त्यांनी गळफास घेऊन आत्महत्या केली .
तुषार यांना पंधरा दिवसांपूर्वी मुलगी झाली होती .यावेळी घरी छोट्या परीचे आगमन झाल्याची वार्ता सोशल मीडियावर शेअर करीत आनंद व्यक्त केला होता.मात्र त्यानंतर अवघ्या पंधरा दिवसात त्यांनी आत्महत्या केल्याने खळबळ उडाली आहे .त्यांची पत्नी अद्याप माहेरी असल्याने तुषार पोलीस वसाहतीतील घरी एकटेच होते .सायंकाळी त्यांनी आत्महत्या केल्याचे उघड झाले. यांच्या आत्महत्येनंतर वरिष्ठ पोलीस अधिकाऱ्यांनी घटनास्थळी धाव घेतली. तुषार हे स्वभावाने अतिशय मनमिळाऊ होते .घटनास्थळी पोलीस अधिकारी , पोलिसांनी अक्षरश: अश्रूंना वाट मोकळी करून देत शोक व्यक्त केला .यावेळी परिसरात तणावपूर्ण शांतता होती .लॉकडाऊनच्या काळात तुषार यांनी पोलीस बंदोबस्त जबाबदारी यशस्वीपणे पार पाडली. त्यांनी सुरवातीला बारामती क्राईम ब्रांच पथकात काम केले .त्यानंतर गेल्या दोन अडीच वर्षांपासून ते शहर पोलिस ठाण्यात ते कार्यरत होते . त्यांच्या आत्महत्येचे कारण समजू शकले नाही .रात्री उशिरापर्यंत याप्रकरणी पोलिसात तक्रार दाखल झाली नव्हती .