Pune Vidhan Sabha Election 2024: कुठेही शुटिंग असले तरी मतदानाला पुण्यात येतोच..!

-अभिनेते सुबोध भावेने बजावला मतदानाचा हक्क

श्रीकिशन काळेपुणे : मी मतदानाच्या दिवशी कुठेही असलो तरी मतदान करण्यासाठी पुण्यात येतोच, आजपर्यंत मी एकही मतदानाचा हक्क चुकवलेला नाही, तसेच प्रत्येक नागरिकाने घराबाहेर पडून मतदानाचा हक्क बजवावा, असे आवाहन अभिनेता सुबोध भावे यांनी केले.विधानसभा निवडणुकीसाठी आज बुधवारी (दि.२०) मतदान होत आहे. सकाळी ७ वाजल्यापासून मतदानाला सुरवात झाली. पुण्यात सुबोध भावे यांनी सकाळी लवकर मतदान केंद्रावर जाऊन आपला मतदानाचा हक्क बजावला.ते म्हणाले, ''मी मतदान नेहमीच करतो. एकदाही मतदान चुकवलेले नाही. माझे आता फलटणला शुटिंग होते, पण काल रात्री मतदानासाठी पुण्यात आलो. आता मतदान केले आणि परत शुटिंगसाठी जाणार आहे. सर्व नागरिकांनी देखील घराबाहेर पडून मतदान करणे आवश्यक आहे. हा लोकशाहीचा उत्सव आहे, त्यात आपला सहभाग असलाच पाहिजे.''