फॅशन स्ट्रीटला काल रात्री लागलेल्या भीषण आगीत अनेक दुकाने जाळून खाक झाली. या आगीत झालेल्या कोट्यावधी रूपयांच्या नुकसानीला राज्याचे नगरविकास खाते जबाबदार असल्याचा आरोप सजग नागरिक मंचचे विवेक वेलणकर यांनी केला आहे. तर पुणे महापालिकेच्या अग्निशमन दलात ५५ % जागा रिक्त असून त्या कधी भरणार असा प्रश्नही त्यांनी उपस्थित केला आहे.
पुण्यात आगी लागण्याच्या घटना वारंवार घडत आहेत. दोन महिन्यांपूर्वी सीरम इन्स्टिट्यूट मध्ये आग लागली होती तर आज फॅशन स्ट्रीट वर भीषण आग लागून कोट्यावधी रुपयांची हानी झाली आहे. अशा प्रकारच्या घटना घडू नयेत यासाठी प्रतिबंधात्मक उपाययोजना राबविणे, फायर सेफ्टी ऑडीट करणे व आगीच्या घटना घडल्या तरी कमीतकमी हानी व्हावी. यासाठी महापालिकेच्या अग्निशमन दलात सुयोग्य व पुरेसे कर्मचारी असणे आवश्यक आहे. अग्नीशमन दलातील अधिकारी व कर्मचारी यांची भरती करण्यासाठी आदर्श सामाईक सेवा प्रवेश नियमावली राज्यातील अग्नीशमन सेवा संचालनालयाने मार्च २०१८ मध्ये तयार करून नगरविकास मंत्रालयाकडे मंजुरीसाठी सादर केली होती. याला तीन वर्षे झाली तरी अजून नगरविकास खाते त्यावर बसून आहे.. याचा परिणाम म्हणजे पुणे महापालिकेच्या अग्नीशमन दलातील भरती रखडली आहे. आजमितीला पुणे महापालिकेच्या अग्नीशमन दलातील मंजूर ९१० पदांपैकी ५१० पदे रिक्त आहेत. पुणे शहराचा विस्तार आणि शहराची सुरक्षितता विचारात घेता या सेवेतील पदे दीर्घकाळ रिक्त ठेवणे अडचणीचे असल्याचे पुणे महापालिकेच्या आयुक्तांनी सातत्याने नगरविकास मंत्रालयाच्या प्रधान सचिवांना कळवूनही मंत्रालयाकडून निर्णय घेतला जात नाही हे दुर्दैव आहे. पुण्यातील सर्वपक्षीय आमदारांनी यासाठी तातडीने पाठपुरावा करणे गरजेचे आहे तरच भविष्यात अशा घटनांना आळा बसेल. असेही त्यांनी यावेळी सांगितले आहे.