पुणे -वैष्णवी हगवणे आत्महत्याप्रकरणी सहआरोपी म्हणून समोर आलेल्या निलेश चव्हाण याला आज न्यायालयात हजर करण्यात आले. आरोपीच्या बाजूने ऍड. स्वानंद गोविंदवार यांनी बाजू मांडली. २४ तासांची मुदत पूर्ण होण्याआधीच आरोपीला कोर्टासमोर हजर करण्यात आले. यावेळी निलेश चव्हाणच्या पोलीस कोठडीची मागणी करण्यात आली. न्यायालयात झालेल्या युक्तीवादानंतर निलेश चव्हाणला ३ जुनपर्यंत पोलीस कोठडी सुनावण्यात आली आहे.
यावेळी सरकारी वकिलांनी न्यायालयात सांगितले की, निलेश चव्हाण याचा या प्रकरणातील सहभाग अत्यंत गंभीर असून, तपासासाठी त्याची पोलिस कोठडी आवश्यक आहे. आरोपीकडे मृत वैष्णवी हगवणेचा मोबाईल व डेटा असून तो डिलिट करण्यात आला आहे; तो डेटा रिकव्हर करायचा आहे. करिष्मा व शशांक हगवणे यांचे मोबाईल फोनही आरोपीकडे असून ते अद्याप सापडलेले नाहीत. चव्हाणकडे शस्त्र परवाना आहे; त्याचा वापर करून वैष्णवीला धमकावण्यात आले असण्याची शक्यता आहे.
निलेश चव्हाण व हगवणे कुटुंबातील सदस्यांमध्ये मोठे आर्थिक व्यवहार झाले आहेत, त्याचा तपास होणे गरजेचे आहे. आरोपी पळून गेला होता, त्याला मदत कोणी केली, कुठल्या मार्गाने तो पोहोचला, याचा शोध घेणे गरजेचे आहे. त्याच्याकडे मुलाचे पालकत्व नसताना बालक का ठेवण्यात आले, याचा देखील तपास आवश्यक आहे. आरोपीचा मोबाईल सीडीआर (Call Detail Record) मिळवणे गरजेचे आहे. तर बावधन पोलिसांनी आरोपीला पाच दिवसांची पोलीस कोठडी देण्याची मागणी केली आहे.
आरोपीच्या बाजूने कोर्टात ऍड. स्वानंद गोविंदवार यांनी युक्तिवाद केला. त्यांनी कोर्टात सांगितले की,केवळ बाळ त्यांच्या ताब्यात असल्याने आरोपीचे नाव या प्रकरणात घेण्यात आले.चव्हाणकडे शस्त्र आहे, मात्र त्याचा वापर कुठेही झालेला नाही. आरोपीविरुद्ध दाखल करण्यात आलेले गुन्हे जाणीवपूर्वक आहेत, सर्व कलमे जामीनपात्र आहेत. फक्त आरोपीला अटक करून त्याच्याविरुद्ध पुरावे गोळा करण्याचा प्रयत्न सुरू आहे; त्यामुळे पोलीस कोठडी देऊ नये.