पुणे :वैष्णवी हगवणे आत्महत्याप्रकरणी पोलिसांच्या ताब्यात असलेला तिचा दीर सुशील हगवणे याला कोथरुड पोलिसांनी सोमवारी (दि. ९) ताब्यात घेतले. पोलिसांची दिशाभूल करून शस्त्र परवाना मिळविल्याचा गुन्हा त्याच्याविरोधात दाखल करण्यात आला आहे. वैष्णवीचा पती शशांक आणि त्याचा मित्र नीलेश चव्हाण यांना आज (दि. १०) ताब्यात घेतले जाणार आहे.
सासरच्या मंडळींनी कोट्यवधी रुपयांची मागणी करून शारीरिक आणि मानसिक छळ केल्याने वैष्णवी हगवणे हिने आत्महत्या केल्याच्या प्रकरणाने राज्यभर खळबळ उडाली. त्या संदर्भात तिचा पती, दीर, सासू आणि नणंदेचा मित्र नीलेश चव्हाण यांना बावधन पोलिसांनी अटक केली. त्या तपासात अनेक धक्कादायक बाबी पुढे आल्या. वैष्णवीचा पती शशांक, दीर सुशील आणि नणंद करिष्माचा मित्र नीलेश चव्हाण यांनी तीन वर्षांपूर्वी एकाच महिन्यात शस्त्र परवाने मिळविले असल्याची बाब पुढे आली, तसेच त्यांनी बनावट पत्ते देऊन हा परवाना घेतल्याचीही माहिती तपासात निष्पन्न झाली. त्या संदर्भात या तिघांविरुद्ध कोथरुड आणि वारजे पोलिस ठाण्यात गुन्हे दाखल करण्यात आले.
हगवणे बंधू आणि अन्य आरोपी बावधन पोलिस ठाण्याच्या कोठडीत होते. पोलिस कोठडीची मुदत संपल्यानंतर त्यांची येरवडा कारागृहात रवानगी करण्यात आली होती. पुणे शहर पोलिसांनी न्यायालयात अर्ज करून सुशील हगवणे याला सोमवारी ताब्यात घेतले. शशांक हगवणे आणि नीलेश चव्हाण यांना मंगळवारी (दि. १०) ताब्यात घेण्यात येईल, अशी माहिती पोलिस उपायुक्त संभाजी कदम यांनी दिली. या तपासातून अनेक धक्कादायक बाबी पुढे येण्याची शक्यता असून, या तिघांना शस्त्र परवाने देण्यास मदत केलेल्या पोलिस अधिकाऱ्यांचीही नवे उजेडात येण्याची शक्यता आहे.