पुणे : शिवाजीनगर-हिंजवडी मेट्रो मार्गिकेवर खांब उभे करण्याचे काम सुरू करण्यात येणार आहे. त्या पार्श्वभूमीवर वाहतूक सुरळीत ठेवण्यासाठी रेंजहिल्स कोपरा परिसरातील वाहतूक व्यवस्थेत तात्पुरते वाहतूक बदल करण्यात आले आहेत. शिवाजीनगरकडून रेंजहिल्स कोपरा येथून उजवीकडे वळण्यास वाहनचालकांना मनाई करण्यात आली आहे.
गणेशखिंड रस्त्यावर आनंदऋषीजी चौकात (सावित्रीबाई फुले पुणे विद्यापीठ चौक) दुमजली उड्डाणपुलाचे काम सुरू आहे. रेंजहिल्स कोपरा परिसरात मध्यभागी मेट्रोचे खांब उभे करण्याचे काम सुरू करण्यात येणार आहे. या भागातील वाहतूक सुरळीत ठेवण्यासाठी मंगळवारपासून (२९ ऑगस्ट) वाहतूक बदल करण्यात आले आहेत. शिवाजीनगरकडून रेंजहिल्स कोपरा (एबील हाऊस) येथून उजवीकडे वळून रेंजहिल्सकडे जाण्यास वाहनचालकांना मनाई करण्यात आली आहे.
गणेशखिंड रस्त्याने शिवाजीनगरकडून रेंजहिल्सकडे जाणाऱ्या वाहनचालकांनी काॅसमाॅस बँकेसमोरून वळावे. तेथून रेंजहिल्स कोपरा येथून डावीकडे वळून इच्छितस्थळी जावे, असे आवाहन वाहतूक शाखेचे पोलिस उपायुक्त विजयकुमार मगर यांनी केले आहे.