जुन्नर (पुणे) : जुन्नर नाणेघाट (ता. जुन्नर) येथे वर्षाविहारासाठी आलेल्या बडोदा (गुजरात) येथील पर्यटकाचा पाण्यात बुडून मृत्यू झाल्याची दुर्दैवी घटना घडली . मृत पर्यटकाचे नाव संजय बालमुकुंद केडिया (वय ४२) असे असून, तो सनफार्मा रोड, बडोदा, गुजरात येथील रहिवासी होता.
यासंदर्भात प्रकाश नरोत्तमल बैगानी (एफ. ७०१, कल्पतरू हार्मनी, वाकड, पुणे ) यांनी पोलिसांकडे फिर्याद दिली आहे. नाणेघाटात वर्षाविहारासाठी आलेले संजय व प्रकाश येथील एका रिसॉर्टमध्ये थांबले होते.
रिसॉर्टच्या मागे असलेल्या ओढ्याच्या पाण्यात दोघेजण अंघोळीसाठी गेले होते. परंतु, संजय यास पाण्याचा अंदाज न आल्याने त्याचा पाण्यात बुडून मृत्यू झाला असून, पोलिसांनी आकस्मिक मृत्यू नोंद केली असल्याचे पोलिस निरीक्षक नारायण पवार यांनी सांगितले.