पुणे - सराफी दुकानाचे शटर उचकटून चोरी करण्याचा प्रयत्न करीत असतानाच तेथे पोलीस आल्याने चोरट्यांनीपोलिसांवर गोळीबार करुन कारमधून पलायन केले. ही घटना बोपोडीतील भाऊ पाटील रस्त्यावरील वर्धमान ज्वेलर्सच्या समोर पहाटे सव्वाचार वाजता घडली. खडकी पोलीस ठाण्यातील पोलीस कर्मचारी माधव गोपनर व त्यांचे सहकारी स्वप्नील घोलप बुधवारी रात्री बीट मार्शल म्हणून नेमणूकीला होते. ते परिसरात गस्त घालत असताना पहाटे भाऊ पाटील रोडवर आले.
शिवाजी गार्डनजवळील रविराज अपार्टमेंटमध्ये वर्धमान ज्वेलर्स नावाचे दुकान आहे. या दुकानाच्या बाहेर एक इनोव्हा कार उभी असल्याचे त्याना दिसून आले. गाडीचे लाईट चालू होते. त्याचवेळी त्यांचे लक्ष दुकानाकडे गेले. तेव्हा दोघे जण दुकानाचे शटर उचकटत असताना त्यांनी पाहिले. त्यांना पाहून चोरट्यांची घाबरगुंडी उडाली. ते घाईघाईत मोटारीकडे येऊ लागले. त्याचवेळी पोलीस पुढे आल्याने त्यांच्यातील एकाने गोपनर यांच्या दिशेने गोळी झाडली. ती त्यांनी चुकविली. गोळी बाजूला असलेल्या मोटारीला लागली. त्यानंतर चोरटे मोटारीतून पळून गेले. या घटनेची माहिती मिळताच वरिष्ठ पोलीस अधिकाऱ्यांनी घटनास्थळी भेट दिली. या मोटारीने आपले हेडलाईट चालू ठेवले असल्याने सीसीटीव्हीमध्ये त्यावरील नंबर दिसण्यास अडचण येत आहे. खडकी पोलीस अधिक तपास करीत आहेत.