लोणी काळभोर : जगातील चौथ्या क्रमांकाचे उंच असलेले माऊंट ल्होत्से शिखर मूळचे सोलापूर व कर्मभूमी लोणी काळभोरचे सुपुत्र सहायक पोलीस निरीक्षक शिवाजी ननवरे सर करून महाराष्ट्र पोलीस दल व लोणी काळभोरच्या शिरपेचात मानाचा तुरा रोवला आहे. यापूर्वी ही त्यांनी जगातील सर्वात उंच शिखर माऊंट एव्हरेस्ट शिखर(८८४८ मीटर) त्यानंतर माऊंट मकालू शिखर (८४८४ मीटर)त्यानंतर माउंट मनासलू शिखर (८१६३ मीटर)व आता जगातील चौथ्या क्रमांकाचे ल्होत्से शिखर(८५१६ मीटर) त्यांनी सर केले.
सध्या ते नागपूर शहर गुन्हे शाखा येथे कार्यरत आहेत. यावेळी बोलताना ननवरे म्हणाले, अत्यंत खराब वातावरण असताना सुद्धा चाळीस दिवस नेपाळ येथे तळ ठोकून जिद्द व चिकाटीच्या जोरावर नियमित खडतर सराव करून आपले कर्तव्य बजावून शिखर यशस्वीरित्या सर केले. अति उंच ठिकाणामुळे हवेतील ऑक्सिजनचे प्रमाण अत्यंत विरळ असते. त्यामुळे साधे चालतानाही गिर्यारोहकांची दमछाक होते. परंतु जिद्द आणि आत्मविश्वास असणारे ट्रेकर्स यामध्ये यशस्वी होतात. ल्होत्से शिखर चढाई अत्यंत खडतर असून जगातील चौथ्या क्रमांकाचे कठीण शिखर आहे. या मोहिमेसाठी त्यांना एव्हरेस्ट वीर भगवान चवले व एव्हरेस्ट वीर पोलीस निरीक्षक संभाजी गुरव यांचे मार्गदर्शन लाभले. तसेच नेपाळमधील पायोनियर एडवेंचरचे निवेश कारकी व मिंग दोरजी शेर्पा यांनी मोलाची मदत केली. माझे शिखर सर केलेले यश हे ऑपरेशन सिंदूर मध्ये शहीद झालेले जवान व पहलगामा हल्ल्यात मृत्यू पडले नागरिक यांना समर्पित करतो.
शिवाजी ननवरे हे आठ हजार मीटर उंचीपेक्षा जास्त उंचीची ४ शिखरे सर करणारे देशातील तसेच महाराष्ट्र पोलीस दलातील एकमेव आणि पहिले पोलीस अधिकारी आहेत. यासाठी त्यांना नागपूर पोलीस आयुक्त रवींद्रकुमार सिंगल, पोलीस उपायुक्त राहुल माकणीकर सहाय्यक पोलिस आयुक्त अभिजीत पाटील तसेच नागपूर शहर सामाजिक सुरक्षा विभाग येथील सर्वांनी मोलाचे मार्गदर्शन व मदत केली सोलापूर जिल्ह्याला आणि पोलीस खात्याला त्यांचा सार्थ अभिमान आहे.त्यांच्या यशाबद्दल लोणीकाळभोर गावातील ग्रामस्थ तसेच त्यांचे पुणे पोलीस दलातील सहकारी मित्र यांनी अभिनंदन केले.