यवत : पत्नीने प्रियकराच्या मदतीने पतीचा खून करून पुरावे नष्ट करत मृतदेह विहिरीत टाकल्याचे यवत पोलिसांच्या तपासात निष्पन्न झाले आहे. पोलिसांनी आरोपी पत्नी व तिच्या प्रियकराला अटक केली आहे.
ही घटना भांडगाव (ता. दौंड) येथील मलभारे वस्तीनजीक घडली आहे. सुनील पांडुरंग जगताप (वय ४२, रा. भांडगाव, ता. दौंड) असे खून झालेल्या व्यक्तीचे नाव आहे. आरोपी पत्नी शीतल जगताप व तिचा प्रियकर अतुल चौघुले यांचे एकमेकांशी प्रेमसंबंध होते. शीतल हिचा पती सुनील तिला दारू पिऊन सतत त्रास देत असे. याच त्रासाला कंटाळून दोघांनी सोमवार (दि.१५) रोजी पहाटे ५ वाजता सुनील जगताप घरासमोर झोपलेला असताना त्याच्या डोक्यात दगड घालून विहिरीत टाकून त्याचा खून केला. तसेच रक्ताने माखलेले कपडे घरासमोर जाळून पुरावा नष्ट केला. खून केल्यानंतर पत्नी शीतल हिने पोलिसांकडे पती हरवला असल्याची तक्रार दिली होती. त्याअनुषंगाने यवत पोलिसांनी शेजारी राहणारे व इतर साक्षीदारांकडे चौकशी केली असता शीतल जगताप व अतुल चौघुले यांचे प्रेमसंबंध असल्याचे पोलिसांना समजले.
काल (दि. १८) रोजी दुपारी ३:३० वाजताच्या सुमारास सुनील जगताप याचा मृतदेह जवळ असलेल्या विहिरीच्या पाण्यावर तरंगताना मिळून आला. सदर मृतदेह बाहेर काढला असता डोक्यावर जखम असल्याचे आढळून आल्यानंतर सदर खूनच असल्याची खात्री पोलिसांना पटली. पोलिसांनी पत्नी शीतल जगताप व अतुल चौघुले यांच्याकडे चौकशी केली असता त्यांनी गुन्ह्याची काबुली दिली. याबाबतचा तपास पोलिस निरीक्षक हेमंत शेडगे यांच्या मार्गदर्शनाखाली यवत पोलिस करत आहेत.