पुणे : आर्य संगीत प्रसारक मंडळाच्या वतीने दरवर्षी आयोजित सवाई गंधर्व भीमसेन महोत्सवाची तयारी पूर्ण झाली असून, बुधवारी (दि. १८) दुपारी ३ वाजता सवाईच्या ७० व्या स्वर यज्ञाला सुरुवात हाेणार आहे. मुकुंदनगर येथील महाराष्ट्रीय मंडळाचे क्रीडासंकुल येथे दि. १८ ते २२ डिसेंबरदरम्यान हा महोत्सव रंगणार असून, कार्यक्रमस्थळी सुमारे हजारो संगीतरसिकांना सामावून घेणाऱ्या भव्यदिव्य अशा मांडवाची उभारणी केली असल्याची माहिती आर्य संगीत प्रसारक मंडळाचे कार्याध्यक्ष श्रीनिवास जोशी यांनी दिली.
वर्षभरात दिवंगत झालेल्या कलाकारांना श्रद्धांजली अर्पण करून या महोत्सवाला सुरुवात होईल. प्रथम भारतरत्न उस्ताद बिस्मिल्ला खान यांचे शिष्य डॉ. एस. बल्लेश व त्यांचे सुपुत्र डॉ. कृष्णा बल्लेश यांचे सुमधुर सनईवादन होईल. यानंतर किराणा घराण्याचे गायक उस्ताद मुबारक अली खान आणि गायक सुधाकर चव्हाण यांच्या शिष्या व कन्या शाश्वती चव्हाण- झुरुंगे आपली गायनसेवा प्रस्तुत करतील. यानंतर आग्रा व जयपूर घराण्याचे सुप्रसिद्ध गायक राम देशपांडे यांचे गायन होईल. व्हायोलिन वादक डॉ. एल. सुब्रमण्यम यांचे कर्नाटक शैलीतील वादन ऐकण्याची संधी यानंतर रसिकांना मिळेल. पतियाळा घराण्याचे सुप्रसिद्ध गायक पं. अजय चक्रबर्ती यांच्या गायनाने पहिल्या दिवसाचा समारोप होईल.
महोत्सवास येणाऱ्या रसिकांच्या दुचाकी व चारचाकी गाड्यांसाठी सुसज्ज पार्किंग केली आहे. तसेच मोठ्या एलईडी स्क्रीन्स, अद्ययावत ध्वनियंत्रणा, खाद्यपदार्थांचे स्टॉल्स आदी सुविधा महोत्सवाच्या ठिकाणी असणार आहेत. शिवाय मंडपाच्या एका बाजूस संगीत क्षेत्राशी संबंधित विविध उत्पादनांचे तर एका बाजूला प्रायोजकांचे स्टॉल्स उभारले आहेत. पुरुष व महिलांसाठी अद्ययावत असे प्रसाधनगृह मंडपाच्या मागील बाजूस उभारण्यात आली आहेत. पीएमपीतर्फे कार्यक्रम संपल्यानंतर विशेष बससेवा संगीत रसिकांसाठी उपलब्ध करून दिल्याचेही जोशी यांनी नमूद केले.