पुणे : जंगली महाराज रोडवरील सन्मान हॉटेलच्या जवळ एका तडीपार गुंडाने एका चित्रकाराला गरम झाऱ्याने हाताला चटके दिल्याचा धक्कादायक प्रकार समोर आला आहे. मात्र, या प्रकरणी डेक्कन पोलिसांनी अदखलपात्र गुन्हा दाखल केला आहे, ही घटना १८ जुलै रोजी रात्री सव्वा नऊ वाजता घडली. याप्रकरणी संजय चंद्रकांत अष्टेकर (वय ५०, रा़ शितोळेनगर, जुनी सांगवी) यांनी डेक्कन पोलिसांकडे तक्रार दिली होती.
याबाबतची माहिती अशी, सुनील अष्टेकर हे चित्रकार असून संभाजी उद्यानात ते १८ जुलैला रात्री चित्र काढत बसले होते़ बॉबी काकडे हा तेथे आला. त्यावेळी तो दारु पिलेला होता़ त्याने अष्टेकर यांच्याकडे २ हजार रुपये मागितले. त्यांनी नकार दिल्यावर त्याने तेथील गरम झारा घेऊन त्यांच्या हाताला चटके दिले़ या घटनेला आता १० दिवस झाल्यानंतरही त्याच्या जखमांचे व्रण अजून हातावर दिसून येतात़ त्यानंतर त्यांनी डेक्कन पोलीस ठाण्यात जाऊन तक्रार दिली़ तडीपार गुंड शहरात येऊन एखाद्याला चटके देतो, हाताने मारहाण करतो, असा गंभीर प्रकार घडला़ तरीही डेक्कन पोलिसांनी त्याच्या तक्रारीची नोंद अदखलपात्र केली. डेक्कन जिमखान्यावरील जंगली महाराज रस्त्यावरील हॉटेल रात्री उशिरापर्यंत गर्दीने ओसंडून वाहत असतात़ तेथे मोठ्या प्रमाणावर वाहतूक व लोकांची ये जा असते़ अशा ठिकाणी तडीपार गुंड येऊन एखाद्याला चटके देतो, ही गंभीर घटना घडूनही त्यावर काहीही कारवाई होत नाही़. बॉबी काकडे याला शिवाजीनगर पोलिसांनी तडीपार केले आहे़ असे असतानाही या घटनेमुळे तो शहरात येऊन राजरोजपणे वावरत असल्याचे दिसून आले आहे. याबाबत डेक्कन पोलीस ठाण्याचे वरिष्ठ पोलीस निरीक्षक दीपक लगड यांच्याशी संपर्क साधला असता त्यांनी सांगितले की, फिर्यादीने आम्हाला संपूर्णपणे हकीकत सांगितलेली नाही़ त्यांनी जेवढी माहिती दिली़ त्यानुसार कारवाई केली आहे़ बॉबी काकडे याचा पोलीस शोध घेत आहे़ तो सापडल्यावर त्याच्या कारवाई करण्यात येईल. मात्र, इतका गंभीर गुन्हा असताना व हा गुन्हा तडीपार गुंडाने केला असल्याचे दिसून येत असतानाही गेल्या १० दिवसात अदखलपात्र गुन्ह्याची नोंद दखलपात्र गुन्ह्यात होऊ शकत नाही़ वरिष्ठ पोलीस अधिकारीही त्यावर काहीही कारवाई करताना दिसून येत नाही.