पुणे: खडकी येथील आर्मीच्या सी क्यु एक ॲम्युनेशन बेस वर्कशॉपमधून एका कर्नलचे पिस्तुल आणि तब्बल २० जिवंत काडतुसे चोरट्यानेचोरुन नेल्याचा प्रकार समोर आला आहे. याबाबत कर्नल समीर गर्ग (वय ५८,रा. आर्मड कोर्प सेंटर अँड स्कुल, अहमदनगर) यांनी खडकी पोलिसांकडे फिर्याद दिली आहे.
याबाबत पोलिसांनी सांगितले की, समीर गर्ग हे कर्नल असून सध्या ते अहमदनगर येथील आर्मड कोप सेंटर ॲन्ड स्कुल येथे कर्नलपदावर कार्यरत आहेत. त्यांची ऑक्टोबर २०२१ मध्ये सी क्यु ए ॲम्युनेशन येथे बदली झाली होती. त्यावेळी त्यांना एक खोली देण्यात आली हाेती. त्यांनी तेथे आपले साहित्य ठेवले होते. त्यांची नंतर अहमदनगरला बदली झाली तरी खोली त्यांच्या ताब्यात होती. २१ मार्च रोजी ते पुण्यात आले तेव्हा खोली व्यवस्थित होती. त्यानंतर आता १२ ऑगस्टला ते पुण्यात आल्यावर त्यांना खोलीची खिडकी तुटलेली दिसली. आतील सर्व साहित्य अस्ताव्यस्थ पडलेले दिसले. पेटीचे कुलूप तोडून त्यातील २५ हजार रुपयांचे पिस्टल व २ हजार रुपयांचे पिस्टलचे २० जीवंत काडतुसे चोरुन नेल्याचे दिसून आले. पोलीस उपनिरीक्षक मगदुम तपास करीत आहेत.