धुक्यामुळे पुण्यातून दिल्लीसह उत्तरेकडे जाणारी सहा विमाने रद्द

धुक्यामुळे या विमानसेवा रद्द करण्यात आल्या आहेत, याबाबतची माहिती पुणे विमानतळ प्रशासनाने दिली...

पुणे : राजधानी दिल्लीत धुके पसरल्याने जनजीवन विस्कळीत झाले आहे. त्याचा मोठा परिणाम विमान वाहतुकीवर झाला. पुण्यातून दिल्लीसह प्रयागराज, राजकोट, अहमदाबाद या ठिकाणी जाणारी पाच विमाने आणि चेन्नईला जाणारे विमान अशा सहा विमानांची उड्डाणे रविवारी रद्द करण्यात आली. धुक्यामुळे या विमानसेवा रद्द करण्यात आल्या आहेत, याबाबतची माहिती पुणे विमानतळ प्रशासनाने दिली.

खराब हवामानाचा फटका हवाई वाहतुकीला वारंवार बसत आहे. पुणे ते दिल्ली विमानसेवेला प्रवाशांची गर्दी आहे. पुण्यातून अनेक उड्डाणे दिल्लीसाठी दररोज होतात. मात्र, गेल्या काही दिवसांपासून दिल्लीत मोठ्या प्रमाणात धुके पडत असल्याने विमान उड्डाणावर मोठा परिणाम होत आहे. खराब हवामानामुळे रविवारी विमानांचे मार्ग वळवण्यात आले.

अधिकाऱ्यांनी दिलेल्या माहितीनुसार, ६ फ्लाइट जयपूरच्या दिशेने, तर एक फ्लाइट मुंबईच्या दिशेने वळवण्यात आली आहे. ही सर्व उड्डाणे पहाटे ४:३० ते सकाळी ७:३० च्या दरम्यान वळवण्यात आली. दिल्लीतील कडाक्याच्या थंडीबरोबरच दाट धुक्याचा दुहेरी सामना करावा लागत असून, पुढील काही दिवस ही स्थिती कायम राहणार आहे. त्याचा परिणाम विमान वाहतुकीवर होईल, असे हवामान खात्याने म्हटले आहे.

Read in English