पुणे - शेजारी रहाणा-या विवाहित जोडप्याचा एकांतातील प्रणय सेल्फी स्टिकच्या मदतीने मोबाइल कॅमे-यामध्ये शूट केल्याची घटना पुण्यातील गृहनिर्माण सोसायटीत घडली आहे. धक्कादायक बाब म्हणजे आरोपी या सेक्स व्हिडीओची धमकी देऊन महिलेला ब्लॅकमेल करण्याचा प्रयत्न करत होता. कुंदन अष्टे असे आरोपीचे नाव असून तो एका मोठया कंस्ट्रक्शन कंपनीत प्लानिक मॅनेजर पदावर नोकरीला आहे. पुणे-बंगळुरु महामार्गावरील उच्चभ्रूंचीवस्ती असलेल्या गृहनिर्माण सोसायटीत हा प्रकार घडला.
24 नोव्हेंबरला हा प्रकार लक्षात आल्यानंतर जोडप्याने हिंजवडी पोलीस स्थानकात कुंदन अष्टे विरोधात गुन्हा दाखल केला. आरोपीने सेल्फी स्टिकच्या मदतीने मोबाइल कॅमे-याने बेडरुममधील प्रणयाच्या क्षणांचे रेकॉर्डिंग केले. मागच्या तीन महिन्यांपासून हा प्रकार सुरु होता असा आरोप त्यांनी केला. अष्टेने संबंधित महिलेच्या मोबाइलवर या क्लिप्स पाठवल्या व तिच्याकडे लैंगिक सुखाची मागणी केली. आपली मागणी मान्य केली नाही तर सोशल मीडियावर या क्लिप्स व्हायरल करण्याची धमकी त्याने दिली होती असे एफआयआरमध्ये म्हटले आहे.
मोबाइलवर आलेल्या या क्लिप्स पाहिल्यानंतर महिलेला धक्काच बसला. तिने धीर एकवटून पतीला माहिती दिली. त्यानंतर पती-पत्नीने या प्रकरणाच्या मूळाशी जाण्याचे ठरवले. मागच्या आठवडयात हे जोडपे त्यांच्या बेडरुममध्ये असताना त्यांना खिडकीजवळ काहीतरी हालचाल होताना दिसली. ते खिडकीजवळ गेल्यानंतर त्यांना कुंदन अष्टे दिसला. त्याने हातात पकडलेल्या सेल्फी स्टिकला मोबाइल फोन लावलेला होता. त्यावेळी या सर्व प्रकरणामागे कुंदन अष्टे असल्याचे लक्षात आले.
दुस-याच दिवशी सोसायटीची मीटिंग लावण्यात आली. या सभेमध्ये अष्टेला सदस्यांनी धारेवर धरले. त्यावेळी कुंदन अष्टेने त्याच्या गुन्ह्याची कबुली दिली. तीन महिन्यापासून हा सर्व प्रकार सुरु असल्याचे त्याने मान्य केले. महिलेकडून शरीरसुख मिळवण्यासाठी हे सर्व केल्याचे त्याने सांगितले. हिंजवडी पोलीस स्थानकाचे पोलीस निरीक्षक रंगनाथ उंदे यांनी ही माहिती दिली. कुंदन अष्टेच्या कृत्याने सोसायटीतील सदस्यानाच नव्हे तर तो ज्या कंस्ट्रक्शन कंपनीत नोकरीला आहे त्यांनाही धक्का बसला. इंजिनिअरचा पदवीधर असलेला अष्टे मूळचा सोलापूरचा आहे. अष्टेचा 2013 साली विवाह झाला असून, त्याला पाच महिन्यांची मुलगी आहे.