पुणे : राष्ट्रवादी काँग्रेस (शरद पवार) पक्षाच्या वर्धापनदिन कार्यक्रमात खासदार सुप्रिया सुळे, जयंत पाटील व अन्य नेत्यांनीही जोरदार टोलेबाजी करत उपस्थित पदाधिकारी, कार्यकर्त्याना आगामी निवडणुकांसाठी तयार केले. यावेळी खासदार निलेश लंके यांनी आपल्या भाषणात जोरदार टोलेबाजी केली. ‘आम्हाला विचार करावा लागेल’ असे पवार म्हंटल्यावर समोरच्या व्यक्तीला ते काम करावेच लागते. असे म्हणताच सभागृहात टाळ्यांचा कडकडाट आणि जोरदार घोषणाबाजी सुरु झाली.
लंके म्हणाले, पवार यांचे ‘हसणे’ व पवार यांचे ‘शांत बसणे’ या दोन गोष्टी ज्याला कळतील त्याला आपला साष्टांग दंडवत. ‘आम्हाला विचार करावा लागेल’ असे पवार म्हणतात, त्यावेळी त्यांना हवे असलेले काम करण्याखेरीज समोरच्या व्यक्तीला दुसरा काही मार्गच रहात नाही. आपल्यासारख्या साध्या कार्यकर्त्याला थेट दिल्लीच्या संसदेत पाठवण्याचे काम पवारच करू शकतात. त्यांची निर्णयक्षमता अफाट आहे. असा नेता आपल्याबरोबर आहे, आपल्याला त्यांचा सहवास मिळतो आहे यासारखी मोठी गोष्ट नाही असे त्यांनी यावेळी सांगितले.
पक्षाच्या वर्धापनदिन कार्यक्रमात भाषण करताना राष्ट्रवादी काँग्रेसचे प्रदेशाध्यक्ष जयंत पाटील यांनी अचानक आपण पदापासून बाजूला होत असल्याचे सूतोवाच केले. याबाबत बोलताना लंके म्हणाले, राष्ट्रवादी हा पक्ष नव्हे तर शरद पवारसुप्रिया सुळे आणि जयंत पाटील यांचे कुटुंब आहे. कुटुंबात कुठलीही नाराजी नाही. पक्ष अखंडितपणे एक संघ आहे. राष्ट्रवादी हा पक्ष शरद पवारांनी बांधलेले एक मंदिर आहे. मंदिराचा पाया म्हणून आमच्यासारखे कार्यकर्ते काम करतात. त्यामुळे पायांना कधीही कळसाकडे पाहायचं नसतं.
शरद पवार सुप्रिया सुळे यांनी जयंत पाटील यांनी प्रदेशाध्यक्ष बाबत घेतलेला निर्णय आपल्यासारख्या सामान्य कार्यकर्त्यांनी मान्य करून पुढे चालत असतो. त्यांच्या निर्णयावर आपण विश्वास ठेवायचा असतो. त्यांच्याकडे राजकीय अनुभव मोठा आहे. अनेक राजकीय चढ-उतार त्यांनी पाहिलेले आहे. 55 वर्षातील वीस वर्ष शरद पवार सत्तेच्या विरोधात होते. त्यामुळे शरद पवार यांना राजकीय अनुभव मोठा आहे. अजित दादांना वर्धापन दिनाच्या शुभेच्छा दिल्या का या प्रश्नावर लंके म्हणाले, आम्ही शरद पवार यांच्या नेतृत्वाखाली काम करतो. आम्ही आमच्या पक्षातील कार्यकर्त्यांना शुभेच्छा देणार असल्याचे त्यांनी यावेळी सांगितले.