पुणे : सावित्रीबाई फुले पुणे विद्यापीठात तब्बल ३०० कोटी रुपयांचा घाेटाळा झाल्याचा आराेप ॲड. कौस्तुभ पाटील यांनी पत्रकार परिषद घेऊन केला आहे. आर्थिक अनियमितता झाल्याच्या या प्रकरणाने खळबळ उडवली असून, हा कथित गैरप्रकार कुलगुरू आणि प्र-कुलगुरू यांच्या आशीर्वादाने झाल्याचा दावाही ॲड. पाटील यांनी केला आहे.
विद्यापीठाने तृतीय श्रेणी सिव्हिल ओवरसीअर कर्मचारी विजय ढवळे यांना ३१ मार्च २०२२ रोजी स्थावर विभागाच्या कार्यकारी अभियंता पदाचा अतिरिक्त कार्यभार दिला हाेता. हा कार्यभार केवळ प्रशासकीय सोयीसाठी व तात्पुरता दिला जाऊ शकतो, मात्र विजय ढवळे यांनी मार्च २०२५ पर्यंत नियमबाह्यरित्या कार्यरत राहत विविध निविदा मंजूर केल्या आणि जवळपास ३०० कोटी रुपयांची बिले पास केली. विशेष म्हणजे १ मार्च २०२३ रोजी रवींद्र परदेशी यांची कार्यकारी अभियंता या पदावर अधिकृत नियुक्ती झाली होती, तरीही ढवळे यांनी बेकायदेशीररित्या काम सुरूच ठेवले, असा आरोपही ॲड. पाटील यांनी केला आहे. याबाबत विद्यापीठ प्रशासनाकडे विचारणा केली असता, आमचे विधी सल्लागार यावर लवकरच खुलासा करतील, असे स्पष्ट केले आहे.
तक्रारीकडे दुर्लक्ष : या प्रकरणात रवींद्र परदेशी यांनी स्वतः कुलगुरूंकडे लेखी तक्रार केली होती. तरीही कुलगुरूंनी त्याकडे दुर्लक्ष केले. त्यावरून त्यांची मूक संमती असल्याचा संशय व्यक्त होत आहे. याची सखोल चौकशी व्हावी, यासाठी महालेखापाल व आर्थिक गुन्हे शाखेकडेही तक्रार करण्यात येणार आहे. तसेच उच्च न्यायालयात याचिका दाखल केली जाणार आहे, असेही ॲड. कौस्तुभ पाटील यांनी सांगितले.