धनकवडी : उपचारासाठी आलेल्या रुग्ण महिलेवर डॉक्टरनेच बलात्कार केल्याचा धक्कादायक प्रकार कात्रज भागात उघडकीस आला. याप्रकरणी पीडित रुग्ण महिलेने पोलिसांकडे तक्रार दिल्यानंतर भारती विद्यापीठ पोलिसांनी डाॅक्टरला अटक केली आहे.
डाॅ. अमित आनंदराव दबडे (वय २९, रा. आंबेगाव खुर्द), असे अटक करण्यात आलेल्या डॉक्टरचे नाव आहे. याबाबत ३२ वर्षीय पीडित महिलेने भारती विद्यापीठ पोलिस ठाण्यात फिर्याद दिली आहे.
पोलिसांनी दिलेल्या माहितीनुसार डाॅ. दबडे याचे कात्रज भागातील मांगडेवाडी भागात कल्पनानंद क्लिनिक आहे. पीडित रुग्ण महिला डाॅ. दबडे याच्या रुग्णालयात तपासणीसाठी आली होती. त्यावेळी त्यांची ओळख झाली. दरम्यान, डाॅ. दबडे याने महिलेचा मोबाइल क्रमांक घेतला. त्यानंतर डाॅ. दबडेने गोड बोलून पुन्हा रुग्णालयात बोलावले. डाॅ. दबडेने मला धमकावून बलात्कार केला, असे महिलेने फिर्यादीत म्हटले आहे. डाॅ. दबडे याने पाठलाग करून त्रास दिला. महिलेने नुकतीच पोलिसांकडे तक्रार दिली असून, सहायक पोलिस निरीक्षक तावडे पुढील तपास करत आहेत.