पुणे : कुटुंबाशी असलेल्या ओळखीचा व विश्वासाचा फायदा घेऊन १९ वर्षीय तरुणीला शिकविण्याचे आमिष दाखवून तिच्यावर बलात्कार करणाºया मौलवीला दत्तवाडी पोलिसांनी अटक केली. युनीस हासीम शेख (५०, रा. सुवर्णयुग मंडळाजवळ, जनता बेकरीमागे, पर्वती) असे अटक करण्यात आलेल्या मौलवीचे नाव आहे.
याबाबत पीडित तरुणीने दत्तवाडी पोलीस ठाण्यात फिर्याद दिली आहे. हा प्रकार पर्वती येथील सुवर्णयुग मंडळाजवळ जनता बेकरीच्या पाठीमागे व इतर ठिकाणी घडला. पीडित तरुणी ही १९ वर्षीय असून शिक्षण घेते, तर युनीस शेख हा मौलवी असून त्याची पीडित मुलीच्या कुटुंबीयांशी ओळख होती. याच ओळखीचा व विश्वासाचा गैरफायदा घेऊन त्याने तरुणीला शिकविण्याचे आमिष दाखविले. तिच्याकडून त्याने तिची मूळ शैक्षणिक कागदपत्रे घेतली. ती कागदपत्रे तरुणीला न देता स्वत:च्या ताब्यात ठेवून ती नष्ट करण्याची धमकी देऊन तिचे व तिच्या आई-वडिलांचे बरेवाईट करण्याचीही धमकी देऊन तिच्यावर वारंवार बलात्कार केला. तिचे अश्लील चित्रीकरण करून आयुष्य उद्ध्वस्त करण्याची धमकी दिली. तसेच त्याने तिच्यावर पर्वती येथील राहत्या घरात, हडपसर, दादर व मुंबई येथील व्हाईट हाऊस येथे अनेकदा बलात्कार केला. तिला जाळ्यात ओढण्यासाठी त्याने इतर साथीदारांचीही मदत घेतल्याचे फिर्यादीत नमूद करण्यात आले आहे. गुन्ह्याचा अधिक तपास करण्यासाठी सरकारी वकिलांनी त्याच्या पोलीस कोठडीची मागणी केली.