अवैध दारू विक्रीवर छापा, नारायणगाव पोलिसांची कारवाई

नारायणगाव : नारायणगाव पोलीस ठाण्याच्या हद्दीतील नारायणगाव, साळवाडी, गुंजाळवाडी, धनगरवाडी गावात अवैध दारू विक्री करणाऱ्या ठिकाणावर छापा टाकून ३ लाख ३ हजार ३९० रु. किमतीचा मुद्देमाल जप्त करण्यात आला आहे, अशी माहिती नारायणगाव पोलीस ठाण्याचे पोलीस निरीक्षक विलास देशपांडे यांनी दिली.

धनगरवाडी गावच्या हद्दीमध्ये उसाचे शेताच्या कडेला नीलेश मारवाडी हा गावठी हातभट्टी दारू निर्मिती करीत असल्याची माहिती मिळताच नारायणगाव पोलीस ठाणेचे पोलीस निरीक्षक देशपांडे यांनी व तपास पथकाने त्या ठिकाणी छापा टाकला. तेथे पाच लिटर तयार गावठी हातभट्टी दारू व ३००० लिटर रसायन असे एकूण ३ लाख १ हजार रु. किमतीचा मुद्देमाल मिळून आला. पोलिसांनी दारूभट्टी उद्ध्वस्त करून नीलेश मारवाडी तसेच नारायणगावच्या हद्दीमध्ये हाॅटेल विजयराजजवळ अवैध दारू विक्री केल्या प्रकरणी विजय मधुकर विटे यांचेवर महाराष्ट्र दारू बंदी कायदा कलम ६५(ई)(फ) प्रमाणे गुन्हा दाखल करण्यात आला आहे.

बोरी साळवाडी हद्दीमध्ये साळवाडी ते भोरवाडी जाणारे रोडचे कडेला सुरेश बसप्पा डोमाले हा दारू विक्री करत असताना मिळून आला. त्याच्यावर गुन्हा दाखल करण्यात आला आहे.

गुंजाळवाडी हद्दीमध्ये वारूळेमळा येथे अलका गोविंद वारूळे ही महिला देशी संत्रा कंपनीची दारू चोरून विक्री करत असताना मिळून आली. तिचेवर देखील गुन्हा दाखल करण्यात आला आहे.

ही कारवाई पुणे ग्रामीणचे पोलीस अधीक्षक अभिनव देशमुख, जुन्नरचे उपविभागीय पोलीस अधिकारी मंदार जवळे यांच्या मार्गदर्शनाखाली पोलीस निरीक्षक देशपांडे, सहायक पोलीस निरीक्षक ताटे, पोलीस उपनिरीक्षक धनवे, पोलीस नाईक साबळे, शेख, पोलीस कॉन्स्टेबल कोबल, लोहोटे, तांबे, सातपुते, ढेंबरे, जायभाये यांनी केली आहे.

नारायणगाव पोलिसांनी धनगरवाडी येथे टाकलेल्या छाप्यात गावठी हातभट्टी रसायन नष्ट केले.