पुणे : लग्नाचे आमिष दाखवून तिच्याशी शारीरिक संबंध ठेवल्याने अल्पवयीन मुली गर्भवती राहिल्या. याप्रकरणी एका दिवशी पोक्सो अंतर्गत ३ गुन्हे दाखल केले असून, दोघांना खडक व स्वारगेट पोलिसांनी अटक केली आहे.
याबाबत एका अल्पवयीन मुलीने स्वारगेट पोलिस ठाण्यात फिर्याद दिली. त्यानुसार पोलिसांनी अशोक अनिल काळे (वय १९, रा. अंबिका झोपडपट्टी) याला अटक केली. आरोपीने फिर्यादीला लग्नाचे आमिष दाखवून शारीरिक संबंध ठेवले. त्यातून ही मुलगी ८ महिन्यांची गर्भवती असल्याचे उघड झाले आहे.
गणेश पेठेत राहणाऱ्या एका १७ वर्षाच्या मुलीने खडक पोलिस ठाण्यात फिर्याद दिली आहे. त्यानुसार, पोलिसांनी प्रमोद महादेव ठोबळे (वय २८, रा. महात्मा फुले पेठ) याला अटक केली आहे. फिर्यादी आणि आरोपी प्रमोद यांची ओळख होती. त्यातून फिर्यादीच्या घरी कोणी नसताना प्रमोद तिच्या घरी आला. तिच्याशी शारीरिक संबंध ठेवले. त्यातून ही मुलगी ३ महिन्यांची गर्भवती राहिली. त्यानंतर आता गुन्हा दाखल केला आहे.
महंमदवाडी येथे राहणाऱ्या एका महिलेने चंदननगर पोलिस ठाण्यात फिर्याद दिली आहे. त्यानुसार, पोलिसांनी गणेश वाघमारे (वय २०,रा. चंदननगर) याच्यावर गुन्हा दाखल केला आहे. फिर्यादी यांच्या १५ वर्षांच्या बहिणीस गणेश वाघमारे याने मे २०२३ ते २७ जुलै २०२३ दरम्यान वेळोवळी लग्नाचे आमिष दाखवून तिच्याशी शारीरिक संबंध केले. त्यातून ती दीड महिन्यांची गर्भवती राहिली आहे.