पुणे : सर्वोच्च न्यायालयाने स्थानिक स्वराज्य संस्थाच्या निवडणुकीसंदर्भात चार आठवड्यांत अधिसूचना जारी करण्याच्या दिलेल्या आदेशानुसार राज्य निवडणूक आयोगाने हालचाली सुरू केल्या आहेत. प्रभाग रचनेसाठी राज्य सरकारला सूचनाही दिल्या आहेत. त्यानुसार येत्या दोन दिवसात महापालिकेची प्रभाग रचनेची प्रक्रिया जाहीर होण्याची शक्यता आहे.
सर्वोच्च न्यायालयाने पुढील चार महिन्यात निवडणुका घेण्याचे स्पष्ट आदेश दिले आहेत. त्यानुसार, राज्य शासनाने प्रभाग रचनेचा कार्यक्रम ठरवला असून, त्यासंबंधीचे आदेश लवकरच जाहीर केले जातील. महायुती सरकारने यंदाही चार सदस्यीय प्रभाग पद्धती लागू ठेवण्याचा निर्णय घेतला आहे.
२०१७च्या महापालिका निवडणुकीतही हीच प्रणाली वापरण्यात आली होती. आता निवडणूक आयोगाने प्रभाग रचना पूर्ण करण्याची जबाबदारी पुन्हा राज्य सरकारवर सोपवली आहे. त्यानुसार प्रभाग रचनेची प्रक्रिया येत्या दोन दिवसांत जाहीर होण्याची शक्यता आहे.