‘सीबीएसई’च्या दहावी-बारावी परीक्षांच्या तारखांमध्ये बदल

वेळापत्रकानुसार दहावीची तीन मार्चला होणारी परीक्षा आता ११ मार्चला, तर बारावीची १० एप्रिलला होईल

पुणे : केंद्रीय माध्यमिक शिक्षण मंडळाने (सीबीएसई) दहावी आणि बारावीच्या परीक्षेत बदल केला आहे. काही प्रशासकीय कारणांमुळे ३ मार्च २०२६ रोजी होणारे पेपर पुढे ढकलले आहे. सुधारित तारखा अधिकृतपणे जाहीर केल्या आहेत. ‘सीबीएसई’ने परिपत्रकाद्वारे ही माहिती दिली.

सुधारित वेळापत्रकानुसार दहावीची तीन मार्चला होणारी परीक्षा आता ११ मार्चला, तर बारावीची १० एप्रिलला होईल. या दोन परीक्षांव्यतिरिक्त इतर सर्व विषयांच्या परीक्षा पूर्वनियोजित वेळापत्रकानुसारच होणार आहेत.

‘सीबीएसई’ने सर्व संलग्न शाळांच्या मुख्याध्यापकांना ही माहिती विद्यार्थ्यांपर्यंत आणि पालकांपर्यंत तातडीने पोहोचवण्याचे आदेश दिले आहेत. यासाठी शाळा प्रशासन, विद्यार्थी आणि पालकांनी सहकार्य करावे, असे आवाहनही ‘सीबीएसई’चे परीक्षा नियंत्रक डॉ. संयम भारद्वाज यांनी केले आहे.