पुणे : पत्नी आणि सासरच्या मानसिक त्रासाला कंटाळून एका तरुणाने गळफास घेऊन आत्महत्या केली. आत्महत्या करण्यापूर्वी त्याने सुसाईट नोट लिहून ठेवली होती. त्यावरून हडपसर पोलिसांनी आत्महत्या करण्यास प्रवृत्त केल्याप्रकरणी पत्नी व सासऱ्याविरुद्ध गुन्हा दाखल केला आहे. सुचित्रा योगेश धनवडे (वय ४०) आनंदा धनवडे (रा. सातववाडी, हडपसर) अशी गुन्हा दाखल केलेल्यांची नावे आहेत. योगेश रूपचंद धनवडे (वय २२) असे आत्महत्या केलेल्याचे नाव आहे.
याप्रकरणी सुरेखा रूपचंद धनवडे (वय ६५, रा. कुरळप, ता. वाळवा, जि. सांगली) यांनी हडपसर पोलीस ठाण्यात फिर्याद दिली आहे. याबाबत पोलिसांनी दिलेल्या माहितीनुसार, योगेश धनवडे हा सध्या बेरोजगार होता. त्यावरून पत्नी सुचित्रा व सासरे आनंदा हे त्याला बोलत असत. त्यांच्यात नेहमी भांडणे होत. दोघांच्या त्रासाला कंटाळून योगेश याने सावतवाडी येथील घरात १० नोव्हेबर रोजी सायंकाळी गळफास घेऊन आत्महत्या केली.
आत्महत्या करण्यापूर्वी त्याने एक चिठ्ठी लिहून ठेवली होती. तसेच योगेशने त्याचा भाऊ दिव्यरत्न यालादेखील पत्नीच्या आणि सासरच्या त्रासाला कंटाळून आत्महत्या करत असल्याची चिठ्ठी पाठवली होती. याप्रकरणी आता आत्महत्येस प्रवृत्त केल्याप्रकरणी गुन्हा दाखल करण्यात आला असून पुढील तपास पोलीस उपनिरीक्षक सुवर्णा गोसावी करीत आहेत.