पुणे : राज्य सेवेची पूर्व परीक्षा रविवारी हाेणार हाेती. त्यासाठी आवश्यक प्रवेशपत्राची (हाॅल तिकिट) प्रिंट काढण्यासाठी मी ग्रंथालयातून बाहेर पडलाे. प्रिंट काढून झाल्यानंतर चहा घेऊन अभ्यासाला बसावं या विचाराने टपरीवर गेलाे. चहाचा घाेट घेत असतानाच अचानक भरधाव कारने उडवले अन् सर्वच हरवून बसलाे... हे शब्द आहेत. भरधाव कारच्या धडकेत पायाला गंभीर दुखापत झालेल्या प्रशांत बंडगर याचे. त्याच्यावर सध्या माेडक रुग्णालयात उपचार सुरू असून, प्रकृती स्थिर आहे.
प्रशांत हा मुळचा साेलापूर जिल्ह्यातील करमाळा तालुक्यातला. आई-वडील शेतकरी. स्पर्धा परीक्षेच्या माध्यमातून अधिकारी हाेण्याचे स्पप्न उराशी बाळगून ताे पुण्यात आला हाेता. तत्पूर्वी त्याने लातूर येथील कृषी महाविद्यालयातून बीएससी ॲग्री पूर्ण केलेला. मागील दाेन वर्षांपासून ज्ञानयोगी अभ्यासिकेत बारा बारा तास अभ्यास करत हाेता. काेणतेही क्लास नाही, की मार्गदर्शन नाही. स्वत:च तयारी करत हाेता आणि या वेळी आपण नक्की पास हाेऊ असा चंग बांधला हाेता.
मात्र, शनिवारी (दि. ३१) सायंकाळी भरधाव कारने उडवले आणि मी परीक्षेला जाण्याऐवजी रुग्णालयात अडकून पडलाे. यातील जखमा पेक्षा परीक्षा हुकणार, याचं अधिक दु:ख हाेत आहे, असेही प्रशांत सांगत हाेता. विचारपूस करणाऱ्या प्रत्येकाला ताे आवर्जून सांगत हाेता, पेपर बुडणार याची वेदना अधिक हाेत असल्याची हळहळ व्यक्त करीत हाेता.