Pune Traffic Advisory: शिवजयंतीनिमित्त पुण्याच्या मध्यवर्ती भागातून मिरवणूक; 'या' रत्स्यांच्या वाहतूक व्यवस्थेत बदल

Pune Shiv Jayanti Celebration: छत्रपती शिवाजी महाराज रस्ता, बाजीराव रस्ता, लक्ष्मी रस्ता, पं. जवाहरलाल नेहरू रस्ता, तसेच कुमठेकर रस्ता, केळकर रस्ता परिसरातील वाहतूक व्यवस्थेत बदल करण्यात आले आहे.

Pune Traffic Update: छत्रपती श्री शिवाजी महाराज यांच्या जयंतीनिमित्त मध्य भागातील वाहतूक व्यवस्थेत गुरुवारी (१९ फेब्रुवारी) वाहतूक बदल करण्यात आला आहे. छत्रपती शिवाजी महाराज रस्ता, बाजीराव रस्ता, लक्ष्मी रस्ता, तसेच पं. जवाहरलाल नेहरू रस्ता परिसरातील वाहतूक व्यवस्थेत बदल करण्यात आले आहे. गर्दी ओसरेपर्यंत प्रमुख रस्त्यांवरील वाहतूक व्यवस्थेत बदल करण्यात आले आहेत.

छत्रपती शिवाजी महाराज जयंतीनिमित्त मध्य भागातून मिरवणूक काढण्यात येते. मध्य भागातील छत्रपती शिवाजी महाराज रस्ता, बाजीराव रस्ता, लक्ष्मी रस्ता, पं. जवाहरलाल नेहरू रस्ता, तसेच कुमठेकर रस्ता, केळकर रस्ता परिसरातील वाहतूक व्यवस्थेत बदल करण्यात आले आहे. बुधवार पेठेतील हुतात्मा चौकातून स्वराज्य रथ मार्गस्थ होतात. शिवाजीनगर येथील श्री शिवाजी प्रिपरेटरी मिलिटरी स्कूल येथे मिरवणुकीचा समारोप होईल. स्वराज्य रथांच्या मिरवणुकीत मोठ्या संख्येने नागरिक सहभागी होतात. या पार्श्वभूमीवर मध्य भागातील वाहतूक व्यवस्थेत बदल करण्यात आले आहेत, अशी माहिती वाहतूक शाखेचे पोलिस उपायुक्त हिंमत जाधव यांनी दिली.

छत्रपती शिवाजी महाराज रस्त्याने स्वारगेटकडे जाणाऱ्या वाहनचालकांनी जंगली महाराज रस्त्यावरील स.गो. बर्वे चौक, झाशीची राणी चौक, खंडोजीबाबा चौक मार्गे टिळक रस्त्याने इच्छितस्थळी जावे. गणेश रस्ता, जिजामाता चौक या भागातील वाहतूक पर्यायी मार्गाने वळवण्यात आली आहे. वाहनचालकांनी दारुवाला पूल मार्गे इच्छितस्थळी जावे. केळकर रस्त्याने आप्पा बळवंत चौकाकडे जाणारी वाहतूक वळवण्यात आली आहे. लक्ष्मी रस्त्यावरील वाहतूक पर्यायी मार्गाने वळविण्यात आली आहे. पूरम चौकातून बाजीराव रस्तामार्गे शिवाजीनगरकडे जाणाऱ्या वाहनचालकांनी टिळक रस्ता, डेक्कन जिमखाना मार्गे शिवाजीनगरकडे जावे. मिरवणुकीचा प्रारंभ झाल्यानंतर वाहनचालकांनी महर्षी विठ्ठल रामजी शिंदे पुलावरून शिवाजीनगरकडे जावे, तसेच मध्य भागात शिवाजीनगरकडून येणाऱ्या वाहनचालकांनी महर्षी विठ्ठल रामजी शिंदे पुलावरून नारायणपेठेकडे यावे. केळकर रस्त्याने बाजीराव रस्त्याकडे येणाऱ्या वाहनचालकांनी नारायण पेठमार्गे इच्छितस्थळी जावे. मध्य भागातील वाहतूक व्यवस्थेत सकाळी सातनंतर बदल करण्यात येणार आहे. मिरवणुकीचा समारोप झाल्यानंतर वाहतुकीस रस्ते खुले करुन दिली जातील.