गरिबीवर मात करून पठ्ठ्या पोहोचला राष्ट्रीय स्तरावर

हडपसर : सातवीत असतानाच वडिलांचे छत्र हरपले. तरीसुद्धा त्याने जिद्द, चिकाटी आणि कष्टाची तयारी ठेवून वाटचाल केली. लग्नसमारंभामध्ये फेटे बांधण्याचे काम केले आणि राष्ट्रीय स्तरावर कबड्डीपटू म्हणून नाव कोरले. असे उल्लेखनीय कार्य करणारा युवक म्हणजे हडपसरमधील (स.नं.१००, गोसावीवस्ती-रामटेकडी) येथील बबलू बन्सी गिरी.

बबलू सध्या एफ.वाय.बी.ए.चे शिक्षण घेत आहे. गोसावीवस्तीमध्ये दहा बाय दहाच्या पत्राच्या खोलीमध्ये आई, दोन भाऊ असा त्यांचा संसार सुरू आहे. मोठा भाऊ मोलमजुरी करतो, त्याला मदत म्हणून बबलूसुद्धा वस्तीमध्ये मिळेल ते काम करत असतो. अगदी वस्तीमध्ये कोणाचे घर बांधायचे असेल तर बांधकामाचे साहित्य वाहून नेण्यासाठी मदत करत असतो. मात्र, कबड्डीचा सराव न चुकता उत्कर्ष क्रीडा संस्थाच्या माध्यमातून योगेश यादव यांच्या मार्गदर्शनाखाली करीत आहे. वयाच्या नवव्या वर्षापासून कबड्डी खेळत असून २०११ साली पहिल्यांदा नॅशनल कबड्डी स्पर्धेमध्ये सहभागी होण्याची संधी मिळाली. त्यातून पुढे आत्मविश्वास वाढला. त्यानंतर २०१३ साली १९ वर्षांखाली कबड्डी खेळात सहभागी होण्याचा मान मिळाला.

स्कूल गेम्स फेडरेशन ऑफ इंडिया २०११-१२, सावित्रीबाई फुले पुणे विद्यापीठ, पुणे, मुंबई, हैदराबाद आणि कुरनाल येथील कबड्डी स्पर्धेत यशाची कमान उंच राखण्यात यश मिळाले. आतापर्यंत सांघिक व वैयक्तिक बक्षिसांसह प्रमाणपत्र मिळाली आहेत. या कबड्डीपटूला प्रमाणपत्र आणि सन्मानचिन्ह ठेवण्यासाठीसुद्धा जागा नाही, त्याने छोट्याशा सूटकेसमध्ये आणि घरामध्ये ठेवली आहेत.

राष्ट्रीय स्तरावर एक सुवर्ण, तसेच सांघिक स्वरूपातील पदके मिळाली आहेत. स्थानिक आणि राज्यस्तरीय पातळीवर दोन नंबरच्या संघामध्ये सध्या बबलू खेळत आहे. लग्नसमारंभामध्ये फेटे बांधण्याचे कामही तो आनंदाने करतो, त्यातून दोन पैसे मिळवून संसाराला हातभार लावत आहे. महापालिकेच्या शाळेतून सुरू केलेला प्रवास राष्ट्रीय स्तरापर्यंत पोहोचू शकतो, त्याने सिद्ध करून दाखविले आहे. इंग्रजी आणि अगदी नावाजलेल्या शाळा असली पाहिजे असे काही नाही. जिद्द आणि कष्ट करून महापालिका व जिल्हा परिषदेच्या शाळेतील विद्यार्थ्यांनी नावलौकिक मिळविला आहे, त्यामध्ये बबलूचाही वरचा क्रमांक आहे.

कोट

मला ज्या वेदना सहन कराव्या लागत आहेत, त्या झोपडपट्टीतील कोणाही मुलाला लागू नयेत. त्यांना चांगले शिक्षण मिळावे, मार्गदर्शन मिळावे, चांगले आयुष्य जगण्याची संधी मिळाली पाहिजे. शासनाच्या योजना आहेत. मात्र, त्या समाजापर्यंत पोहोचत नाही, ही मोठी खंत आहे.

- बबलू बन्सी गिरी, कबड्डीपटू

फोटो : लग्नसमारंभामध्ये फेटे बांधण्याचे काम करून राष्ट्रीय स्तरावर कबड्डीपटू म्हणून नाव कोरलेला हडपसरच्या गोसावीवस्तीतील आपल्या आईसोबत बबलू बन्सी गिरी.