पुणे : शहरात गेल्या काही दिवसात अल्पवयीन मुलींवरील विनयभंगाच्या घटनांमध्ये वाढ झाल्याचे पाहायला मिळत आहे. एकाच दिवशी वेगवेगळ्या ठिकाणी तीन विनयभंगाच्या घटना घडल्या असून, त्यातील एका घटनेत बापानेच मुलीबरोबर अश्लील कृत्य केल्याचे समोर आले आहे.
पहिली घटना सदाशिव पेठ भागातील एका सोसायटीमध्ये सोमवारी ( दि. २९) घडली. आरोपीने १६ वर्षाच्या अल्पवयीन मुलीला शाळेतील वर्कशॉप करिता लागणारे साहित्य खरेदी करण्याकरिता रविवार पेठेत नेले. त्यानंतर त्याचा जेवणाचा डबा घेण्याचा बहाणा करून मुलीला त्याच्या घरी नेले. तिच्याशी जवळीक साधून मला किस देतेस का? असे म्हटल्याने मुलीने तुम्हाला बायको आणि बाळ असल्याचे सांगितले. मात्र माणसाला फिलिंग असल्याचे सांगत त्याने मुलीचा विनयभंग करण्याचा प्रयत्न केला. याप्रकरणी मंगेश गायकवाड या आरोपीवर विश्रामबाग पोलीस स्टेशन येथे भा.दं वि. कलम ३५४ आणि ३५४ ( अ) आणि पोस्कॉ ८ व १२ कलमानुसार गुन्हा दाखल करण्यात आला आहे.
मांजरी बुद्रुक येथील पीडित मुलीच्या राहत्या घरी जाऊन आरोपीने विनयभंग केल्याची दुसरी घटना घडली. पीडित मुलीने हडपसर पोलीस ठाण्यात फिर्याद दिली आहे. निखिल शिरीष थोरात ( वय १९ ) असे मुलाचे नाव आहे. फिर्यादीचे आई वडील दोघेजण कामानिमित्त घराबाहेर गेले होते. फिर्यादीचा भाऊ हा पाणी आणण्याकरिता घराबाहेर गेला होता. शेजारी राहणारा ओळखीचा मुलगा मुलीच्या घराच्या दरवाज्यापाशी आला आणि तू मला खूप आवडतेस, मला तुझ्याशी लग्न करायचे आहे असे म्हणाला. तेवढ्यात फिर्यादीचा भाऊ तिथे आल्याने आरोपी पळून गेला. आरोपी सातत्याने फिर्यादीचा पाठलाग करायचा. माझ्याशी लग्न कर तुला सुखात ठेवेन असे सातत्याने म्हणत असल्याने तरुणावर विनयभंगाचा गुन्हा दाखल करण्यात आला आहे.
तिस-या घटनेत बापानेच मुलीबरोबर अश्लील कृत्य केल्याने बापाविरद्ध गुन्हा दाखल करण्यात आला आहे. पीडित मुलीच्या आईनेच समर्थ पोलीस स्टेशनमध्ये यासंबंधी फिर्याद दिली आहे. नवरा दारू पिऊन मुलीला मारहाण करीत असे असेही फिर्यादीत म्हटले आहे.