लोकमत न्यूज नेटवर्क
पुणे : जिल्ह्यातील ग्रामपंचायत रणधुमाळी संपल्यानंतर सर्वांचे लक्ष सरपंच आरक्षणाकडे लागले होते. या आरक्षणाची प्रतीक्षा शुक्रवारी संपली. तालुक्याच्या ठिकाणी निघालेल्या सोडतीत अनेक जागा महिलांसाठी राखीव निघाल्याने गावगाड्याचा कारभार या महिला हाकणार असल्याचे स्पष्ट झाले. पूर्वी असलेल्या आरक्षणात नव्याने काढण्यात आलेल्या सोडतीत काही मोजके बदल झाल्याने अनेकांना संधी तर काहींची संधी हुकणार आहे.
जिल्ह्यातील ८४६ ग्रामपंचायतींची मदत डिसेंबरअखेर संपत होती. या ग्रामपंचायतींची निवडणूक प्रक्रिया जानेवारी महिन्यात पार पडली. जवळपास महिनाभर निवडणुकीची रणधुमाळी चालली होती. मात्र, निवडणुकीपूर्वी सरपंचपदाचे आरक्षण सोडत रद्द करण्यात आली होती. ती ग्रामपंचायतीच्या निवडणुका झाल्यावर जाहीर करण्यात येईल, असे आदेश ग्रामविकास विभागाने दिले होते. यामुळे अनेक इच्छुकांचे नियोजन कोलमडले होते. असे असतानाही ते निवडणुकीला सामोरे गेले होते. निवडणूक निकालानंतर सदस्य निवडून आले. यामुळे आता गावाचे नेतृत्व कोण करणार याचे वेध १८ तारखेनंतर निवडून आलेल्या उमेदवारांना लागले होते. यामुळे सरपंच आरक्षण सोडतीकडे सर्वांचे लक्ष होते.
जिल्ह्यातील १४०७ ग्रामपंचायतींच्या सरपंचपदासाठी आरक्षण सोडत शुक्रवारी काढण्यात आली. रद्द करण्यात आलेल्या सोडतीमधील महिला आणि ओबीसी प्रवर्गातमधील थोडेफार बदल वगळता पूर्वी काढण्यात आलेले आरक्षण बहुतांश ठिकाणी कायम राहिले आहे.
चौकट
सरपंचपदाचे यापूर्वी काढण्यात आलेले आरक्षण रद्द करण्यात आले होते. यामध्ये अनुसूचित जाती अनुसूचित जमाती प्रवर्गाच्या आरक्षणामध्ये कोणताही बदल झालेला नाही. मात्र, महिला आणि ओबीसी आरक्षणासाठी थोड्या ठिकाणी सोडती काढाव्या लागल्या. त्यामुळे तालुक्यांचा विचार करता अगदी मोजक्याच ठिकाणी आरक्षणामध्ये बदल झालेले आहेत.
_____
आठवडाभरात सरपंच निवडणुका
सरपंच आणि उपसरपंच निवडणुकीसाठी येत्या आठवडाभरात तारखा जाहीर केल्या जाणार आहेत. जिल्हा प्रशासनाकडून निवडणुकीच्या तारखा आणि निवडणूक निर्णय अधिकारी निवडणुकांच्या प्रक्रियेला सोमवारपासून सुरुवात होईल. निवडणुकीची तारीख जाहीर झाल्यानंतर नवनिर्वाचित ग्रामपंचायत सदस्यांना पहिल्या सभेची नोटीस दिली जाईल. त्यानंतर ८ दिवसांनी प्रत्यक्ष उपसरपंच आणि उपसरपंच निवडणूक होईल, असे जिल्हाधिकारी कार्यालयातील सूत्रांनी सांगितले.
चौकट
जिल्ह्यात ७४८ ग्रामपंचायतींची निवडणूक १५ जानेवारीला झाली. त्यानंतर १८ जानेवारी रोजी मतमोजणी झाली. यामध्ये निवडून आलेल्या नवनिर्वाचित सदस्यांची अधिसूचना ग्रामपंचायत अधिनियम कलम ३७ प्रमाणे जिल्हाधिकाऱ्यांनी जाहीर केली. त्यामुळे सरपंच आरक्षण सोडतीनंतर आता लवकरच सरपंचपदाच्या निवडणुकादेखील जाहीर केल्या जाणार आहेत.