लोणावळा :मुंबई-पुणे एक्स्प्रेस वेवरील मुंबई लेनवर किलाेमीटर ३६ जवळ कंटेनर व खासगी प्रवासी बस यांच्यात भीषण अपघात झाला. या अपघातात एक जणाचा जागीच मृत्यू झाला असून, १४ जण जखमी झाले. यापैकी एकाची प्रकृती गंभीर असून, उर्वरित जखमीवर प्राथमिक उपचार करण्यात आले. जखमींपैकी पाच जणांवर खोपोली येथील शासकीय रुग्णालयात दाखल करण्यात आले आहे. हा अपघात सोमवारी सकाळी सातच्या सुमारास घडला.
मुंबई लेनवर किलाेमीटर ३६ जवळ भरधाव वेगातील कंटेनर (क्र. एमएच ४६ बीएप ८९५७) च्या चालकाचा गाडीवरील ताबा सुटल्याने, समोरून जाणाऱ्या खासगी आराम बसला (क्र. एमएच ४८ एवाय ७९९९) पाठीमागून जोरात धडकला. या बसमध्ये ३५ प्रवासी होते. यामध्ये संकेत सावंत (रा.डोंबिवली) याचा मृत्यू झाला, तर जवळपास १४ प्रवासी जखमी झाले.
अपघाताची माहिती समजताच, बोरघाट पोलिस अपघातग्रस्तांच्या मदतीसाठी या संस्थेचे कार्यकर्ते व इतर यांनी घटनास्थळी दाखल होत, जखमींना उपचारासाठी रवाना केले. क्रेनच्या साहाय्याने अपघातग्रस्त वाहने बाजूला करत रस्ता वाहतुकीसाठी खुला केला. बसमधील प्रवासी हे सिंधुदुर्गमध्ये लग्न सोहळ्यासाठी गेले होते. कोल्हापूरमार्गे परतत असताना एक्स्प्रेस वेवर हा अपघात झाला.