पुणे : भारतरत्न डाॅ. बाबासाहेब आंबेडकर जयंतीनिमित्त शुक्रवारी (दि. १४) जिल्हाधिकारी कार्यालय परिसरात वाहतुकीत बदल करून पर्यायी मार्गाने वळविण्यात येणार आहे. यात मंगळवार पेठेतील शाहीर अमर शेख चौकातून मालधक्का चौकाकडे जाणारी वाहतूक वळविण्यात येणार आहे. जिल्हाधिकारी चौक परिसरातील वाहतूक बदल गर्दी ओसरेपर्यंत लागू राहणार आहे, अशी माहिती वाहतूक शाखेचे पोलिस उपायुक्त विजयकुमार मगर यांनी दिली आहे.
असा असेल बदल...
- शाहीर अमर शेख चौकातून मालधक्का चौकाकडे जाणारी वाहने आरटीओ चौक, जहाँगीर चौकमार्गे इच्छित स्थळी जातील.
- जीपीओ चौकातून बोल्हाई माता चौक तसेच मालधक्का चौकाकडे जाणारी वाहने किराड चौक, नेहरू मेमोरिअल चौकमार्गे इच्छित स्थळी जातील.
- पुणे स्टेशन चौकातून मालधक्का चौकाकडे जाणारी वाहतूक नरपतगिरी चाैकातून वळविण्यात येणार आहे. वाहनचालकांनी पुणे स्टेशन, अलंकार चित्रपटगृहमार्गे इच्छित स्थळी जावे.
- सोमवार पेठेतील नरपतगिरी चौकातून वाहनचालकांनी १५ ऑगस्ट चौक, कमला नेहरू रुग्णालय, पवळे चाैक, कुंभारवेस चौकमार्गे इच्छित स्थळी जावे.
- बॅनर्जी चौकातून पाॅवर हाउस चौक, नरपतगिरी चौक, १५ ऑगस्ट चौक, कमला नेहरू रुग्णालय, पवळे चौकमार्गे इच्छित स्थळी जावे.
येथे करा वाहन पार्किंग :
जिल्हाधिकारी कार्यालय परिसरात येणाऱ्या अनुयायांसाठी वाहने लावण्याची व्यवस्था आरटीओ कार्यालय, एसएसपीएमएस मैदान, पुणे स्टेशन येथील तुकाराम शिंदे वाहनतळ, ससून काॅलनी येथे करण्यात आली आहे.
लष्कर, विश्रांतवाडी भागातही वाहतूक बदल
लष्कर भागातील अराेरा टाॅवर्स परिसरातील डाॅ. बाबासाहेब आंबेडकर पुतळा परिसरातील आणि विश्रांतवाडी चौकातील वाहतूक व्यवस्थेत बदल करण्यात येणार आहे. या भागातून मिरवणूक काढण्यात येत असल्याने वाहनचालकांनी पर्यायी मार्गांचा वापर करावा, असे आवाहन करण्यात आले आहे.
दांडेकर पूल चौकात रात्री वाहतूक बदल :
सिंहगड रस्त्यावरील दांडेकर पूल चौकातील विविध मंडळांकडून डाॅ. आंबेडकर जयंती साजरी करण्यात येते. गुरुवारी (दि. १३) रात्री आठनंतर या भागातील वाहतूक व्यवस्थेत बदल करण्यात येणार आहे. गर्दी ओसरेपर्यंत दांडेकर पूल परिसरातील वाहतूक व्यवस्थेत बदल केले आहेत.