पुणे : दिवाळी अवघ्या काही दिवसांवर आल्यामुळे लोकांनी सुट्यांचे नियोजन करण्यास सुरुवात केली आहे. पुण्याहून सुटणाऱ्या ९८ टक्के रेल्वेचे बुकिंग फुल्ल झाल्यामुळे आता गावी कसे जायचे? हा प्रश्न लोकांना पडला आहे. याउलट कोरोनानंतर रविवारी पहिल्यांदाच पुणे आंतरराष्ट्रीय विमानतळावरून १७२ प्रवासीविमानांची ये-जा झाली, त्याद्वारे २५ हजार प्रवाशांनी प्रवास केल्याची नोंद केली आहे. ही संख्या दिवाळीच्या सुट्यांमुळे आणखी वाढणार असल्याने विमानाच्या संख्येत वाढ होण्याची शक्यता वर्तवण्यात येत आहे.
विमानाचा प्रवास आजही मध्यमवर्गीयांच्या आवाक्याबाहेरचा असल्याने त्यांचे प्रथम प्राधान्य रेल्वेलाच असते. पुणे स्टेशनवरून सुटणाऱ्या रेल्वेंपैकी ९८ टक्के रेल्वे फुल्ल झाल्याने परराज्यात जाणाऱ्या प्रवाशांसमोर मोठी अडचण निर्माण झाली आहे. दुर्दैवाची बाब म्हणजे अजूनपर्यंत रेल्वे बोर्डाकडून दिवाळी विशेष रेल्वे सुरू करण्यासंदर्भात कोणताही निर्णय झालेला नाही. त्यामुळे दिवाळी विशेष रेल्वे सुरू करण्याची मागणी जोर धरत आहे.
का वाढते प्रवासी संख्या?
- राज्याच्या विविध भागातील नागरिक कामानिमित्त मोठ्या संख्येने पुणे जिल्ह्यात आले आहेत. येथे मोठ्या प्रमाणात औद्योगीकरण झाल्याने ही संख्या वाढत गेली.- पुणे हे विद्येचे माहेरघर म्हणूनदेखील ओळखले जाते, त्यामुळे लाखो विद्यार्थी शिक्षणासाठी येथे येतात. दिवाळीत विद्यार्थ्यांना १५ ते २० दिवस सुटी असते. त्यामुळे बहुतांश पालक दिवाळीनिमित्त गावी जातात किंवा फिरायला जाण्याचे नियोजन करतात. परिणामी पुण्यातून सुटीच्या कालावधीत विदर्भ, मराठवाडा आणि उत्तर महाराष्ट्रात जाणाऱ्या नागरिकांचे प्रमाण अधिक आहे.- मध्य रेल्वेकडून गणेशोत्सव, छटपूजा आणि उन्हाळी सुटी विशेष रेल्वे चालवल्या जातात. याच प्रकारे दिवाळी विशेष रेल्वे कधी सुरू करणार, असा प्रश्न विचारला जात आहे.- पुण्याहून उत्तर भारतात जाणाऱ्या विमानांच्या संख्येत वाढ केली असून, दिवसाला १५ ते १७ हजार प्रवासी विमानाने ये-जा करतात. इतर ठिकाणच्या विमानांच्या संख्येत देखील वाढ होणे गरजेचे आहे.