वह्यांवरही नरेंद्र मोदींची छबी

नुकत्याच झालेल्या लोकसभा निवडणुकीत नरेंद्र मोदी यांची लाट दिसून आली. या लाटेत त्यांचा करिश्मा दिसून आला. त्यानंतर आता बाजारपेठेतील विविध वस्तू,

पिंपरी : नुकत्याच झालेल्या लोकसभा निवडणुकीत नरेंद्र मोदी यांची लाट दिसून आली. या लाटेत त्यांचा करिश्मा दिसून आला. त्यानंतर आता बाजारपेठेतील विविध वस्तू, इतकेच नाही, तर शालेय वह्यांच्या मुखपृष्ठावर त्यांची छबी झळकली आहे. गेल्या वर्षी सप्टेंबर महिन्यात भाजप व मित्र पक्षांनी नरेंद्र मोदी यांना पंतप्रधानाचा उमेदवार जाहीर केले. त्या दृष्टीने त्यांनी वेगवेगळे फंडे वापरत मोदी यांना घरोघरी पोहोचविण्यास यश मिळविले. त्याच्या नावांचा आणि छायाचित्राचा वापर करून अनेक वस्तू बाजारपेठेत दाखल झाल्या. त्यासाठी टीव्ही, रेडिओ, वृत्तपत्र आणि सोशल नेटवर्कवर जाहिरातीचा मोठा प्रमाणात वापर केला गेला. लोकसभा निवडणूक काळात भावी पंतप्रधान मोदी यांच्या नावाने चहा, जिलेबी, भाकरी, मिठाई बाजारात दाखल झाली. तसेच त्यांचे छायाचित्र असलेली टोपी, झेंडे, तसेच साड्या यांची बाजारपेठेत धूम होती. भाजपला सर्वाधिक जागा काबीज करण्यास या मोदी करिश्म्याचा लाभ झाला. याच पद्धतीने आता महाविद्यालयाच्या वह्यावर त्याची छबी झळकत आहे. त्यास विद्यार्थी व पालकांची मोठी पसंती मिळत आहे. भावी पंतप्रधानांची छबी असलेल्या वह्या दप्तरात ठेवण्यास ते उत्सुक दिसत आहेत. अशा वहीची दुकानदारांकडे मागणी केली जात आहे. फुलस्केप वहीवर विविध मुद्रेतील मोदी यांचे छायाचित्र लक्षवेधी आहेत. मागील पृष्ठभागावार तिरंगा असून त्यावर ‘वंदे मातरम्’ लिहिले आहे. मुखपृष्ठाच्या आतील बाजूस मोदी यांचा जन्म, आई -वडील, बालपण, शिक्षण, राजकीय प्रवास अशी त्याची संपूर्ण माहिती आहे. मागील पृष्ठभागाच्या आतील बाजूस त्यांना मिळालेल्या विविध राष्टÑीय व आंतरराष्टÑीय पुरस्काराची माहिती दिली आहे. चिंचवड स्टेशन येथील दुकानदार सुरेश गादिया यांनी सांगितले, ‘‘मोदी यांची छबी असलेल्या वह्यांना मागणी आहे. मोदी यांचा शपथविधी होईपर्यत या वह्यांवर २० टक्के सूट आहे. (प्रतिनिधी)