डीईएसच्या योग सप्ताहात १० हजारांहून अधिक विद्यार्थी

योग सप्ताहाच्या शुभारंभानिमित्त सोमवारी सर्व शाळांमध्ये ऑनलाइन व्याख्याने, परिसंवाद, अभिनव स्पर्धा, लघुपट, योगासने आणि सूर्यनमस्कारांची प्रात्यक्षिके आयोजित करण्यात आली होती. न्यू इंग्लिश स्कूल टिळक रोड शाळेत विविध स्पर्धांचे आयोजन करण्यात आले होते. न्यू इंग्लिश स्कूल रमणबाग प्रशालेत जागतिक योग साधनेतील तज्ज्ञ डॉ. संप्रसाद विनोद आणि डॉ. सुदाम काटे यांनी मार्गदर्शन केले. न्यू इंग्लिश मीडियम स्कूलमध्ये योगाचा इतिहास आणि महत्त्व या विषयावरील लघुपट दाखविण्यात आला.

डीईएस सेकंडरी स्कूलमध्ये योग शिक्षक किरण पाटील यांनी आदर्श जीवन पद्धती, योगासने, प्राणायाम, आहार या विषयांवर उदृबोधक व्याख्यान दिले. डीईएस प्रायमरी स्कूलमध्ये संगीताच्या तालावर योगासनांची प्रात्यक्षिकांनी योग आणि संगीत दिन साजरा केला. गोळवलकर गुरुजी विद्यालयात जगदीश वाघ यांनी योगाभ्यासावरील व्याख्यान आयोजित केले होते.अहिल्यादेवी शाळेत योगासनांची प्रात्यक्षिके दाखविणारी ध्वनिचित्रफित ऑनलाइन दाखविण्यात आली. संगीत दिनानिमित्त जलतरंग वादक मिलिंद तुळणकर यांनी नादमय, रंजक, उद्बोध व्याखान दिले.

नवीन मराठी शाळेत नियमितपणे सहकुटुंब योगासने करण्याचा संकल्प करण्यात आला. त्यासाठी विद्यार्थ्यांबरोबर कुटुंबीयांचे अर्ज भरून घेण्यात आले. रानडे बालक मंदिरच्या विद्यार्थ्यांनी संगीताच्या तालावर प्रात्यक्षिके सादर केली.