Pune: लग्नाचे आमिष दाखवून बलात्कार, मुलासह आईवर गुन्हा दाखल

पुणे : लग्नाचे आमिष दाखवून बलात्कार केला. त्यातून गरोदर राहिलेल्या तरुणीचा गर्भपात घडवून आणणाऱ्या मुलासह त्याच्या आईवर चंदननगर पोलिस ठाण्यात गुन्हा दाखल करण्यात आला आहे, तसेच तरुणीला जातीवाचक शिवीगाळ केल्याप्रकरणी ॲट्रॉसिटीचा गुन्हा दाखल करण्यात आला आहे. विशाल विजय आकरे आणि दीपाली विजय आकरे (दोघेही रा. माळवाडी, हडपसर), अशी गुन्हा दाखल झालेल्या आरोपींची नावे आहेत. याप्रकरणी एका २२ वर्षीय तरुणीने फिर्याद दिली आहे. हा प्रकार जुलै २०२२ ते फेब्रुवारी २०२४ दरम्यान घडला.

पोलिसांनी दिलेल्या माहितीनुसार, पीडित तरुणी आणि आरोपी हे ओळखीचे आहेत. याच ओळखीतून विशालने तरुणीला प्रेमाच्या जाळ्यात अडकवून तिला लग्नाचे आमिष दाखवले होते. त्यानंतर विशालने तरुणीवर वेळोवेळी लैंगिक अत्याचार केले. या प्रकारामुळे ती गर्भवती राहिली. त्यानंतर विशाल आणि त्याच्या घरच्यांनी तिला, तुमची व आमची बरोबरी होऊ शकत नाही, तू जर पोलिसांत तक्रार केली तर तुझे अश्लील फोटो व व्हिडीओ व्हायरल करू, अशी धमकी दिली, तसेच तिच्या पोटातील बाळ खाली करण्यास भाग पाडत तिला गर्भपाताच्या गोळ्या खाण्यासाठी दिल्या. याचदरम्यान आरोपींनी तिला जातीवाचक शिवीगाळ केल्याचे फिर्यादीत म्हटले आहे. याप्रकरणाचा पुढील तपास सहायक पोलिस आयुक्त संजय पाटील करत आहेत.