बारामती : कॅन्सर झालेल्या रुग्णास कॅन्सर बरा करतो, असे सांगून बारामती शहरातील एकाची २ लाख ५१ हजार ५०० रुपयांची फसवणुक केल्याप्रकरणी अटक करण्यात आलेल्या आरोपी मनोहर उर्फ मामा भोसले याच्या पोलीस कोठडीत न्यायाधीश एन.व्ही रणवीर यांनी तीन दिवसांची वाढ केली आहे. ११ सप्टेंबर रोजी न्यायालयाने मनोहर मामा भोसले यास १६ सप्टेंबर पर्यंत पाच दिवसांची पोलीस कोठडी सुनावली होती. यामध्ये आता वाढ करण्यात आली आहे.
शशीकांत खरात (रा.साठेनगर, कसबा बारामती ता. बारामती जि पुणे) यांनी बारामती ग्रामीण पोलीस ठाण्यात तक्रार दिली आहे. त्यानुसार तक्रारदार खरात यांचे वडीलांना थायरॉईड कॅन्सर हा दुर्धर आजार झाला आहे. त्यामुळे खरात हे मनोहरमामा भोसले भोंदुबाबाच्या मठामध्ये गेले. त्याने तो बाळूमामा यांचा अवतार असल्याचा बनाव केला. तक्रारदार यांच्या वडीलांचा गळयावरील थायरॉईड कॅन्सर बरा करतो, असे सांगून त्यावरील औषध म्हणून बाभळीचा पाला, साखर, भंडारा खाण्यास दिले. तसेच विशाल वाघमारे उर्फ नाथबाबा व ओंकार शिंदे यांच्यासोबत संगणमत करून चढावा, अभिषेक व भेटीसाठी त्यांचेकडून एकुण २,५१,५००/- रुपये त्यांचे व त्यांचे वडीलांचे जिवाचे बरे वाईट होईल अशी भिती घालून देण्यास भाग पाडून त्यांची फसवणूक केली आहे. पैसे परत मागितल्यास जिवे ठार मारण्याची धमकी दिल्याची फिर्याद तालुका पोलीस ठाण्यात दाखल आहे.
याप्रकरणी पुणे ग्रामीण पोलिस स्थानिक गुन्हे शाखा व बारामती तालुका पोलिसांनी मनोहर मामाला शुक्रवारी (दि १०) सालपे (जि.सातारा) येथे फार्महाऊसवर जाऊन ताब्यात घेतले आहे. उर्वरीत दोन आरोपी मात्र, अद्याप फरार आहेत. पोलीस त्यांच्या मागावर आहेत. त्यांना अटक करावयाची असून भोसले याच्याकडील गुन्ह्यातील रक्कम आणि अन्य बाबींचा तपास करावयाचा आहे. त्यामुळे त्याची पोलीस कोठडी वाढवण्याची मागणी सरकार पक्षाच्या वतीने अ‍ॅड.पी.एन कुचेकर यांनी केली. त्यावर न्यायालयाने पोलीस कोठडीत तीन दिवसांची वाढ केली आहे. मनोहर भोसले याच्या वतीने अ‍ॅड.हेमंत नरुटे यांनी काम पाहिले.
दरम्यान गुरुवारी(दि १६) देखील न्यायालयाबाहेर मनोहरमामा भोसलेला पाहण्यासाठी त्याच्या समर्थक, भक्तांसह सह उत्सुकतेपोटी नागरीकांनी मोठी गर्दी केली होती. पोलिसांनी न्यायालयाच्या आवारात कडेकोट पोलीस बंदोबस्त ठेवला होता.