पुणे : मैत्रिणीसोबत लपाछपी खेळत असताना ११ वर्षीय मुलीला चॉकलेट देऊन घरी बोलावून घेतले. तिच्यासोबत अश्लील चाळे करुन विनयभंग केला. हा प्रकार दत्तनगर परिसरातील एका कॉलनीत घडला आहे. याप्रकरणी पीडित मुलीच्या ३८ वर्षीय आईने मंगळवारी (दि. २६) भारती विद्यापीठ पोलिस ठाण्यात फिर्याद दिली आहे. यावरून पोलिसांनी अमर मोहन भोसले (२७, रा. दत्तनगर) याच्यावर विनयभंगासह पोक्सो ॲक्ट अंतर्गत गुन्हा दाखल केला आहे.
अधिक माहितीनुसार, फिर्यादी यांची ११ वर्षीय मुलगी तिच्या मित्र-मैत्रिणींसोबत लपाछपी खेळत होती. त्यावेळी मुलगी जिन्यात लपली असताना आरोपीने तिला जेम्सच्या गोळ्या खाण्यास दिल्या. त्यानंतर तिला घरात बोलावून घेऊन अमर भोसले याने तिच्याशी अश्लील चाळे केले.
मुलीने त्याला ढकलून देऊन घरातून पळ काढला. त्यावेळी आरोपीने तिचा पाठलाग करून तिला जिन्यात अडवले. याबाबत कोणाला काही सांगू नको. आपल्यात सिक्रेट राहू दे, असे म्हणून तिच्या स्त्री मनास लज्जा उत्पन्न होईल, असे कृत्य केले. हे प्रकरण पीडित मुलीने आईला सांगितले आणि आईने लगेचच पोलिस ठाण्यात धाव घेत तक्रार केली. अधिक तपास पोलिस उपनिरीक्षक भोसले करत आहेत.