पुणे : जुन्या मोबाईलचे दीड हजार रुपये न दिल्याच्या रागातून तरुणाने एकाच्या गळ्यावर ब्लेडने वार करुन तसेच डोक्यात मारुन खून केल्याचा प्रकार उघडकीस आला आहे.
वारजे माळवाडी पोलिसांनी, राम श्रीमंत वाघमारे (वय २०, रा. वारजे पुलाजवळ, फुटपाथवर, वारजे) याला अटक केली आहे. अमरजीत जगन्नाथ गोयल (वय ५०, रा. वारजे पुलाजवळ, मुळ रा. उत्तर प्रदेश) असे खून झालेल्याचे नाव आहे. याबाबत पोलीस नाईक राहुल कदम यांनी वारजे माळवाडी पोलिसांकडे फिर्याद दिली आहे. ही घटना वारजे पुलाजवळील पृथक बराटे गार्डनसमोर शनिवारी रात्री ११ वाजता घडली.
अधिक माहितीनुसार, वारजे पुलाजवळील बराटे गार्डनसमोर फुटपाथ एक जण जखमी अवस्थेत असल्याची माहिती पोलिसांना मिळाली. पोलिसांनी त्याला रुग्णालयात नेले असता त्याचा मृत्यु झाल्याचे डॉक्टरांनी घोषित केले. शवविच्छेदनाचा अहवालात गळ्यावर ब्लेडने वार केल्याचे तसेच डोक्यात मारहाण केल्याने झालेल्या जखमांमुळे त्याचा मृत्यु झाल्याचे म्हटले. पोलिसांनी याबाबत चौकशी केल्यावर निलेश खोजे व गणेश टाळकुटे यांच्याकडून माहिती मिळाली. अमरजीत गोयल व राम वाघमारे हे दोघेही फुटपाथवर रहात होते. गोयल याला वाघमारे याने जुना मोबाईल दिला होता. मात्र, त्याचे दीड हजार रुपये गोयल देत नव्हता. त्याच्यातून दोघांमध्ये वाद झाला. त्यात वाघमारे याने त्याला मारहाण करुन ब्लेडने वार केले. त्यात गोयल याचा मृत्यु झाला. सहायक पोलीस निरीक्षक रमेश बाबर तपास करीत आहेत.