जैन पर्युषण महापर्व विशेष

लोकमत न्यूज नेटवर्क

पुणे : पर्युषण महापर्वामध्ये महावीर जन्मकल्याणक वाचनाला महत्त्व असते. कोरोनामुळे यंदा हा कार्यक्रम मंगळवारी ऑनलाईन पद्धतीने करण्याचा निर्णय बहुतांश जैन मंदिरांच्या विश्वस्तांनी घेतला आहे. त्यामुळे घरोघरी भगवान महावीरांच्या पाळण्याचे आयोजन करण्यात येणार नाही.

शहरात चातुर्मासार्थ, आचार्य दौलतसागरजी, आचार्य नंदीवर्धनसागरसुरीश्वरजी, गणिवर्य वैराग्यरतिविजयजी, आचार्य विमलबोधीजी, हर्षसागरसुरीजी, लाभेशविजयजी यांच्यासह अनेक साधु साध्वीजींच्या उपस्थितीत विविध धार्मिक कार्यक्रम सुरू आहेत.

जैन धर्मीयांच्या पर्युषण महापर्वाच्या पाचव्या दिवशी भगवान महावीरांच्या जन्मकल्याणकाचे वाचन करण्यात येते. मंदिरमार्गमध्ये हा दिवस येत्या मंगळवारी (ता.७) येत आहे. भगवंतांनी एकूण २७ वेळा मानवजन्म धारण केले. त्यापैकी, एक जन्म हा पर्युषण महापर्वाच्या पाचव्या दिवशी येतो.त्यामुळे, पाचव्या दिवशी त्यांचा जन्मकल्याणक साजरा करण्यात येतो. जैन साधु- साध्वीजींच्या उपस्थितीत विविध धार्मिक कार्यक्रमांचे आयोजन करण्यात येते. यादिवशी, भगवंतांच्या जन्माप्रीत्यर्थ प्रातिनिधिक स्वरूपात छोटा सजवलेला पाळणा तयार करून, त्यात भगवान स्वरूपात श्रीफळ ठेवण्यात येते.

मंदिरांमध्ये मुख्य जन्मकल्याणकाचा कार्यक्रम झाल्यानंतर हा पाळणा काही भाविक काही तासांसाठी आळीपाळीने आपल्या घरी घेऊन जातात. त्यावेळी भगवंतांचे दर्शन घेण्यासाठी तसेच पूजा-अर्चा करण्यासाठी साधर्मिक बंधु भगिनींना निमंत्रित करण्यात येते. त्यामुळे गर्दी होण्याची दाट शक्यता असते. या सर्व कारणांमुळे हा दिवस धामधुमीचा असतो.

कोरोनामुळे, या सर्व धार्मिक कार्यक्रमांना यंदा फाटा देण्याचा निर्णय बहुतांश मंदिरांच्या विश्वस्तांनी घेतला आहे. त्याऐवजी महावीर जन्मकल्याणकाचा कार्यक्रम ऑनलाईन पद्धतीने करण्याचा निर्णय घेण्यात आला आहे.