पुणे : पुण्याच्या कोंढवा परिसरात एका पतीने पत्नीला चौथ्या मजल्यावरून खाली फेकून दिले. इमारतीच्या सुपरवायझर सोबत भांडण न केल्यामुळे चिडलेल्या पतीने हे धक्कादायक कृत्य केले. शनिवारी दुपारी हा प्रकार घडला. त्यानंतर गंभीर जखमी झालेल्या पत्नीला रुग्णालयात दाखल करण्यात आले. पतीच्या या कृत्याने कोंढवापोलिसांनी या प्रकरणी गुन्हा दाखल केला आहे.
याप्रकरणी नितीन दसरथ दहिरे (वय ३२) याला पोलीसांनी अटक केली आहे. याप्रकरणी कोंढवा पोलीस ठाण्यात २५ वर्षीय पत्नीने तक्रार दिली आहे. हा प्रकार शनिवारी दुपारी घडला आहे.
पोलिसांनी दिलेल्या माहितीनुसार, कोंढवा येथील एका निर्माणाधीन इमारतीत फिर्यादी या पतीसोबत राहतात. याठिकाणी लाईट फिटिंग चे काम सुरू आहे. काही दिवसांपूर्वी नितीन दहिरे याचे लाईट फिटिंग करण्यासाठी आलेल्या सुपरवायझर सोबत भांडण झाले होते. त्यावेळी पत्नीने आपली बाजू घेत सुपरवायझर सोबत भांडण केले नसल्याचा राग त्याच्या मनात होता. याच कारणावरून त्यांच्यात शनिवारीही भांडण झाले. त्यानंतर नितीन दहिरे याने रागाच्या भरात फिर्यादीला लाथाबुक्क्यांनी मारहाण केली. त्यानंतर चौथ्या मजल्यावरून लिफ्टसाठी सोडलेल्या मोकळ्या जागेतून त्यांना खाली ढकलून दिले. फिर्यादी या घटनेत गंभीर जखमी झाले आहेत. अधिक तपास कोंढवा पोलीस करत आहेत.