पुणे : 'पुणे शहराकडे उपमुख्यमंत्री फडणवीस यांचे विशेष लक्ष असते. त्यांचे पुण्यावर जास्त प्रेम आहे, असे सातत्याने म्हटले जाते. त्यामुळेच मी पुणे लोकसभा लढवणार असल्याच्या चर्चा राजकीय वर्तुळात आहेत. मात्र मी पुण्यातून कधीही लोकसभानिवडणूक लढवणार नाही', असा खुलासा करत पुणे लोकसभेच्या उमेदवारीबाबत होत असलेल्या चर्चांना फडणवीस यांनी पूर्णविराम दिला. महाराष्ट्र राज्य मराठी पत्रकार संघाच्या पुढाकाराने पत्रकारांसाठी सांगवडेत होत असलेल्या खासगी तत्त्वावरील गृहप्रकल्पाच्या भूमिपूजन सोहळ्यात सोमवारी संध्याकाळी ते बोलत होते.
यावेळी बोलताना फडणवीस म्हणाले की, पत्रकारांना परवडणाऱ्या घरासाठी जेवढे शक्य होईल, तेवढे प्रयत्न आम्ही करू. मुख्यमंत्री एकनाथ शिंदे यांच्याशी चर्चा करून गृहनिर्माण संस्थेच्या माध्यमातून विविध घटकांना सवलतीच्या दरात कमी व्याजदरात घरे कशी देता येतील, याचा विचार आम्ही करू. पत्रकारांसाठी गृहकर्जाच्या व्याजात विशेष सबसिडी योजना आणण्यासाठी मी मुख्यमंत्र्यांशी बोलेल. पुण्याचा विकास करण्यासाठी आम्ही कटिबद्ध असून येणाऱ्या काळात पुण्याच्या हिताचे प्रकल्प व्हावेत, यासाठी जनआंदोलन उभं राहण्याची गरज आहे.