पुणे : पूर्ववैमनस्यातून एका दुश्मनाला शोधण्यासाठी आलेल्या ६ जणांच्या टोळक्याने तळजाई परिसरातील वनशिव वस्तीमध्ये पहाटे धुमाकूळ घालत दहशत पसरविली. रस्त्याच्या कडेला पार्क केलेल्या ४० हून अधिक वाहनांची तोडफोड केली. त्यामुळे संपूर्ण परिसरात दहशत निर्माण झाली आहे.
तोंडाला रुमाल बांधलेले ६ जणांच्या गुंडांच्या टोळक्याने या वसाहतीत पहाटे साडेतीन वाजण्याच्या सुमारास प्रवेश केला. त्यांनी एका पाठोपाठ एक गाड्यांवर दगडफेक करीत हातातील कोयते, लोखंडी गज, लाठ्यांचा मारा केला. वाहनांच्या काचा फोडत आरडाओरडा करत हे टोळके गोंधळ घालत होते. त्यांच्यामुळे कोणाचीही घराबाहेर पडण्याची हिंमत झाली नाही. त्यांनी काही घरांवरही दगडफेक केली. या घटनेत १० ते १५ रिक्षा, २५ दुचाकी, काही कार यांचे नुकसान झाले आहे.
याबाबत पोलीस उपायुक्त र्स्मातना पाटील यांनी सांगितले की, हे गुंड वारजे पोलीस ठाण्याच्या रेकॉर्डवरील गुन्हेगार आहे. त्यांच्यावर खूनाचा प्रयत्न केल्याचा गुन्हा दाखल आहे. एकाला शोधण्यासाठी ते या वसाहतीत आले होते. तो न मिळाल्याने त्यांनी वसाहतीत तोडफोड केली. या टोळक्याची ओळख पटली असून त्यांचा शोध घेऊन अटक करण्याचे काम सुरु आहे.