बारामती: बारामती शहरातील एका खासगी कार्यालयामध्ये काम करणाऱ्या युवतीवर तरूणाने चाकूने हल्ला केल्याचा खळबळजनक प्रकार समोर आला आहे. या हल्ल्यामध्ये युवतीच्या बोटाला दुखापत झाली असून हल्लेखोर सीसीटीव्हीमध्ये कैद झाला आहे.
बारामती येथील नीरा डावा कालव्या शेजारी असणाऱ्या पूर्वा कॉर्नर कॉम्प्लेक्समधील केसरी टूर्सच्या कार्यालयामध्ये मंगळवारी (दि. १८) सकाळी पर्यटनाचे बुकिंग घेणाऱ्या युवतीवर चाकू हल्ला करण्यात आला. हल्लेखोर तरूणाच्या शोधासाठी पोलीस पथके रवाना करण्यात आली आहेत. मंगळवारी (दि. १८) सकाळी साडे दहा वाजता हे कार्यालय उघडल्यानंतर तरूणाने आतमध्ये प्रवेश केला. ‘मी सोमवारी कार्यालयात येवून गेलो, परंतु तुम्ही कार्यालय लवकर बंद केले’ असे म्हणत या युवकाने युवतीच्या गळ्यात हात घातला. आपल्या गळ्यातील सोन्याची साखळी चोरतोय की काय अशी शंका तिला आल्याने तिने त्याचा हात पकडला. माझा हात सोड, असे म्हणत हातावर चाकूचा वार करत हा युवक पळून गेला. घाईत चप्पल न घालताच तो दुचाकीवरून पसार झाला.
युवतीने कार्यालयाबाहेर येत त्याचा पाठलाग केल्याचे सीसीटीव्ही फुटेजमध्ये दिसून येत आहे. या हल्ल्यात युवतीच्या बोटाला चाकू लागून जखम झाली. शहर पोलिसांनी तात्काळ घटनास्थळी भेट दिली. सीसीटीव्ही फुटेजच्या आधारे हल्लेखोराचा शोध घेतला जात आहे. दरम्यान सोमवारी सुद्धा या परिसरात हा युवक दोन तास येऊन बसल्याची माहिती पुढे येत आहे. या हल्ल्यात युवतीच्या एका बोटाला दुखापत झाली असल्याचे पोलिस निरीक्षक सुनील महाडीक यांनी सांगितले.