लोकमत न्यूज नेटवर्क
राजगुरुनगर : शिरोली (ता. खेड) येथे जमिनीच्या पैशाच्या आर्थिक वादावरून जिवलग मित्रानेच मित्राचा डोक्यात दगड घालून खून केला आहे. राहुल बाबाजी सावंत (वय २२, रा. शिरोली, ता. खेड) असे खून झालेल्या युवकाचे नाव आहे.
या घटनेबाबत दोन आरोपींना पोलिसांनी १२ तासांत जेरबंद केले आहे. राहुल सांवत व हेंमत वाडेकर हे जिवलग मित्र होते. राहुल सांवत व वाडेकर यांनी जमिनीच्या व्यवहारात पैसे लावले होते. राहुल सांवत हा वारंवार वाडेकर यांच्याकडे पैशाची मागणी करत होता. सोमवारी (दि.४) रात्री १० च्या सुमारास राहुल सांवत, हेंमत बाबूराव सांवत (वय २५, रा. शिरोली, ता. खेड), शिवा भाऊ कुडेकर (वय २६, रा. चव्हाणमळा, पाबळ रोड), सुनील मोहन पवार (रा. रेटवडी, ता. खेड) हे सर्व जण राजगुरुनगर शहरालगत असणाऱ्या ढुम्या डोंगरांच्या पायथ्याशी दारू पिण्यास गेले होते. दारू पिल्यानंतर जमिनीच्या पैशावरून वाद झाला. या कारणावरून राहुल सांवत यांच्या डोक्यात दगड घालून खून करण्यात आला. या घटनेनंतर पोलिसांनी तपासाची चक्रे फिरवत पोलीस निरीक्षक सतीश गुरव यांच्या मार्गदर्शनाखाली पोलीस हवालदार स्वप्निल गाढवे, शेखर भोईर, सचिन जतकर, निखिल गिरीगोसावी यांनी आरोपी हेंमत वाडेकर, शिवा कुडेकर या ताब्यात घेतले आहे. सुनील पवार हा फरार झाला असून पोलीस त्याचा शोध घेत आहे. या घटनेबाबत राहुल सांवत यांची मोठी बहिण मोहिनी महेंद्र राक्षे (रा. राक्षेवाडी, ता. खेड) यांनी खेड पोलीस ठाण्यात फिर्याद दिली आहे.
फोटो : मृत राहुल सावंत